75 տարեկան գյումրեցի Կիմա Հայրապետյանը կիրակի օրն առաջին անգամն էր ձերբակալվում, 3 գիշեր անցկացրեց ճաղերից այն կողմ: Իրավապահները նրան մեղադրում են Գյումրիի ընտրություններին ընտրակաշառքի խոստում ընդունելու համար: Խոստումն, ըստ քրեական գործի, տվել է «Մեր քաղաքը» դաշինքի ավագանու անդամ, 70-ամյա Անահիտ Խալաթյանը: Նրանք միասին էին ձերբակալվել:
«Էդ ինչքան մարդ եկավ, ինձ քննեց, մազերիս վրա ինչքան որ հաշիվ կա, ինձ ստիպում էին ասել՝ փող, փող, տո ի՞նչ փող, փողի հարց չի եղել, ինձ առաջարկություն չեն արել, ինձ փող չեն տվել, ես ուրիշի փող չեմ տվել, ոչ էլ խոստացել եմ», - «Ազատությանն» ասաց Անահիտ Խալաթյանը:
Հակակոռուպցիոն քրեական դատարանն այսօր ձերբակալությունից ազատ արձակեց ընտրակաշառքի գործով մեղադրյալ երկու տարեց կանանց: Դատական նիստերը դռնփակ էին:
Կիմա Հայրապետյանին ու Անահիտ Խալաթյանին իրավապահները ձերբակալել էին ընտրատեղամասի մոտ, երբ նրանք Կիմայի 90-ամյա բարեկամուհուն օգնել էին հասնել քվեարկության: Նախօրեին 90-ամյա Տիկուշին ազատ էին արձակել առանց որևէ մեղադրանքի, իսկ մյուս երկուսին մեղադրանք ներկայացրել, երկուսն էլ մեղքը չեն ընդունում:
Դատարանը երկուսի նկատմամբ էլ ընտրել է ազատության մեջ վարչական հսկողություն խափանման միջոցը, որը տեղաշարժի ու հաղորդակցման որոշակի սահմանափակում է ենթադրում:
Դատարանից դուրս գալուց հետո 75 տարեկան կինը պատմեց, թե ինչպես են Հակակոռուպցիոնի աշխատակիցներն իրեն քաշքշելով նստեցրել ավտոմեքենա. «Ավտոյից դեռ չէի իջել, քաշեցին, գցեցին ավտոն էնպես որ, հետն էլ աչքերը վրաս չռել են, մատը էսպես կանե, թե հանկարծ հիմա չխոսես: Ասացի՝ տղա ջան, մարդասպա՞ն եմ, խուլիգա՞ն եմ, ի՞նչ եմ»:
Հակակոռուպցիոն կոմիտեն հերքում է այս, ինչպես նաև մյուս կնոջ՝ Անահիտ Խալաթյանի մեղադրանքները ձերբակալելիս հարվածներ հասցնելու մասին:
Փաստաբանները, որ պատճառաբանելով նախաքննական գաղտնիքը, մանրամասներ չեն ներկայացնում, միայն հայտնեցին, որ մեղադրանքի հիմքում Խալաթյանի և Հայրապետյանի խոսակցությունն է, իսկ այն, ըստ փաստաբան Արսեն Բաբայանի, ոչ թե ընտրակաշառքի, այլ կենցաղային ընտանեկան խնդրի մասին է եղել, որի լուծման համար 15 հազար դրամի կարիք է եղել:
«Ինչ-որ անձինք իրար հետ խոսել են՝ կանայք, խոսել են կենցաղային որոշակի հարցերի շուրջ, որ այստեղ անհրաժեշտություն կա այս գործն անել և այլն: Հիմա դա բերել են, կապել են ընտրակաշառք խոստանալու հետ այն դեպքում, երբ պարզ հարց է առաջանում՝ ընտրակաշառք խոստանալիս ավելի հեշտ չի՞ տանել, փողը տալ, ասել՝ գնա, ընտրի», - ասաց փաստաբան Արսեն Բաբայանը:
Կիմա Հայրապետյանն «Ազատությանը» պատմեց, որ եղբոր ընտանիքի հետ մի բակում է ապրում՝ միայնակ, կենցաղային խնդիրներ ունի, բայց միևնույն է՝ որևէ ընտրակաշառքի մասին խոսք չի եղել: Ասաց՝ ճիշտ է՝ Անահիտ Խալաթյանի հետ ազգականներ չեն, բայց նա իր մտերիմն է: Իրենց հետ ձերբակալված 90-ամյա կինն էլ իր բարեկամն է, ում հետ միասին գնացել են քվեարկության:
Փաստաբան Ռուբեն Մելիքյանը բողոքարկելու է այս որոշումը: Դատարանն արգելել է Հայրապետյանին շփվել նույն բակում ապրող հարազատների հետ. «Էլեկտրոնային սարքի կիրառում, ես չգիտեմ, էլեկտրոնային սարքի կիրառումն ինչպե՞ս է ապահովելու... ես գիտեմ՝ բազմաթիվ տեխնիկական խնդիրներ կան»:
Փաստաբանը պնդում է, որ դատարանը կարող էր 75 տարեկան կնոջն ազատ արձակել ավելի շուտ՝ մեղադրյալի կարգավիճակից հետո, երբ արդեն պարզ էր, որ քննիչը մտադիր չէ նրան տանել կալանքի, բայց դատարանը մերժեց Մելիքյանի այս միջնորդությունը՝ Հայրապետյանին 72 ժամ պահելով անազատության մեջ:
Այսօր դատարանում վատացել էր Անահիտ Խալաթյանը, ճնշումն էր բարձրացել: Շտապօգնություն եկավ, բժիշկները առաջարկեցին տեղափոխվել հիվանդանոց հետազոտությունների, Խալաթյանը հրաժարվեց:
Փաստաբան Մելիքյանն ընդգծում է՝ իրավապահները խտրական մոտեցում ունեն, օրինակ է բերում իշխանական թեկնածու Սարիկ Մինասյանին:
«Քաղաքացիական պայմանագրի» թեկնածուն երբ մի տատիկի ասում էր՝ փայտդ վերջանա, ես քեզ փայտ կտամ քարոզարշավի ժամանակ, այ այդ նույն փաստը կարելի էր այս ամեն ինչի փոխարեն այստեղ քննել», - ասաց նա:
Կիրակի օրը Գյումրիում անցկացված տեղական ընտրություններում երրորդ տեղը զբաղեցրած Մարտուն Գրիգորյանի մեղադրյալ թիմակից Անահիտ Խալաթյանը նախկին ընտրություններում ևս ակտիվ է եղել: Համացանցում մի տեսանյութ կա, որտեղ 2017 թվականին հենց ինքն է խոստովանում, որ ընտրողներին հավաքել, տարել է ընտրատեղամասեր: