Երրորդ նախագահ Սերժ Սարգսյանին արդարացնելուց չորս ամիս անց դատավոր Վահե Միսակյանի լիազորությունները դադարեցվեցին: Բարձրագույն դատական խորհուրդը դատաքննության ընթացքում միաձայն որոշել է, որ դատավորը էական կարգապահական խախտում է թույլ տվել։
ԲԴԽ նախագահն այսօր հակիրճ հիմնավորեց, թե Միսակյանը թերացել է իր վարույթում եղած քրեական գործի ընթացքում:
«Փորձաքննություն նշանակելու և վկաներ հարցաքննելու անհրաժեշտության բացակայության պայմաններում ընդամենը մեկ գործողություն պահանջող, մեկ մեղադրյալ հարցաքննելու համար նշանակել է 18 դատական նիստ, որոնցից 14-ը հետաձգել է: Արդյունքում գործը քննել է երեք տարուց ավելի ժամկետով, չի պահպանել առանց արդարադատության շահերին վնասելու, ողջամիտ ժամկետում և նվազագույն դատական ծախսերի կատարմամբ օրենքով իր իրավասությանը վերապահված հարցը քննելու ու լուծելու վարքագծի կանոնը», - ասաց ԲԴԽ նախագահ Կարեն Անդրեասյանը:
Դատավորի նկատմամբ կարգապահական վարույթը հարուցվել էր Արդարադատության նախարարության միջնորդությունից հետո և վերաբերում էր ոչ թե Սերժ Սարգսյանի, այլ նախկին վարչապետ Վազգեն Մանուկյանի քրեական գործին:
44-օրյա պատերազմից հետո իշխանության հեռացման պահանջով փողոցային պայքարի ելած Մանուկյանը մեղադրվում էր իշխանությունը զավթելուն և սահմանադրական կարգը բռնի տապալելուն ուղղված հրապարակային կոչերի համար։
Դատավոր Վահե Միսակյանը, գործը ստացել է 2021-ի մարտին, բայց քննությունն ավարտել և դատավճիռ հրապարակել է երեք տարի անց՝ 2024-ի հունիսին: Նախարարության միջնորդության համաձայն՝ դատավորը խախտել է դատավարական ժամկետները: Ինքը՝ Միսակյանը, այսօր հրաժարվեց մեկնաբանել իր լիազորությունները դադարեցնելու որոշումը: Իսկ գործի քննության ընթացքում միայն պնդել էր, թե ձգձգելու որևէ միտում չի ունեցել:
«Ո՞րն էր դիտավորությունը 6 դատական նիստերը հետաձգելուն նպաստելու, խոչընդոտող հանգամանքներ կանխամտածված ստեղծելու համար: Ես այդպես էլ չտեսա միջնորդության մեջ շարժառիթի մասին որևէ հիմնավորում: Որովհետև եթե խոսվում է դիտավորությամբ որևէ գործողության մասին, դիտավորությունը պետք է ունենա շարժառիթ, սա քրեական իրավունքում հայտնի ինստիտուտ է», - նշել է նա:
Բարձրագույն դատական խորհուրդը վերջին վեց տարում կարգապահական պատասխանատվության ենթարկելու հիմքով 17 դատավորի լիազորություն է դադարեցրել։ Մոտ երեք ամիս առաջ էլ նախկին ՔՊ-ական, այժմ ԲԴԽ նախագահ Կարեն Անդրեասյանի ղեկավարած կառույցը դատավորի պաշտոնից հեռացրեց երկրորդ նախագահ Ռոբերտ Քոչարյանի գործը քննած Աննա Դանիբեկյանին: