Սաուդյան Արաբիայում ավարտվել են ԱՄՆ-ի և Ռուսաստանի բանակցությունները՝ երկու գերտերությունների արտգործնախարարների գլխավորությամբ:
Ուկրաինական հակամարտությունը լուծելը հեշտ չի լինի, կողմերը ստիպված կլինեն զիջումների գնալ, բանակցություններից հետո Fox News-ին ասել է ԱՄՆ պետքարտուղար Մարկո Ռուբիոն։ Պետքարտուղարը հայտարարել է, որ բոլոր կողմերը պետք է ներգրավված լինեն Ուկրաինայի կարգավորմանը, այդ թվում՝ ԵՄ-ն։
Նա շեշտել է նաև, որ կողմերը պայմանավորվել են ջանքեր գործադրել՝ վերականգնելու դեսպանատների լիարժեք գործունեությունը, ինչպես նաև բարձր մակարդակի խմբեր ստեղծել՝ Ուկրաինայում խաղաղության հաստատման և տնտեսական համագործակցությունը խթանելու համար։
ՌԴ նախագահի օգնական Յուրի Ուշակովը բանակցությունները դրական է գնահատել: «Ռուսաստանն ու Միացյալ Նահանգները պայմանավորվել են հաշվի առնել միմյանց շահերը»,- նշել է նա:
Բանակցությունների ընթացքում Ռուսաստանի և ԱՄՆ-ի պատվիրակություններն իրենց դիրքորոշումներն են հայտնել ուկրաինական կարգավորման վերաբերյալ և պայմանավորվել, որ այս թեմայով բանակցողների առանձին թիմեր կապի մեջ մտնեն, տեղեկացրել է ՌԴ նախագահի օգնականը:
«Մեզ անհրաժեշտ է սերտ աշխատանք երկու երկրների պատվիրակությունների միջև, մենք պատրաստ ենք դրան, բայց դեռ դժվար է խոսել երկու առաջնորդների հանդիպման կոնկրետ ժամկետի մասին»,- ասել է Յուրի Ուշակովը։
Սա ռուս և ամերիկացի բարձրաստիճան պաշտոնյաների առաջին դեմ առ դեմ հանդիպումն է՝ Ուկրաինա լայնամասշտաբ ներխուժումից ու Ռուսաստանի մեկուսացումից հետո։
Բանակցությունների նախօրեին Պետդեպարտամենտը հայտարարեց, թե սա ոչ թե հանդիպում է Ուկրաինայի հարցով, այլ փորձ՝ համոզվելու՝ որքանով է Ռուսաստանը վստահելի։ Մոսկվան, մինչդեռ, հայտարարում է, թե հանդիպման նպատակն է վերականգնել ռուս-ամերիկյան լարված հարաբերությունները։
«Առայժմ խոսքը երկկողմ բանակցությունների մասին է։ Մենք իրականում Էլ-Ռիյադ դրա համար ենք գնում», - ասել է Ռուսաստանի ուղղակի ներդրումների հիմնադրամի տնօրեն և ՌԴ նախագահի մտերիմ-խորհրդատու Կիրիլ Դմիտրիևը, որը ևս էլ-Ռիյադում է՝ նշելով, որ ԱՄՆ թիմի հետ այսօրվա քննարկումները շատ կարևոր են թե՛ երկու երկրների, թե՛ ողջ աշխարհի համար:
«Մենք իսկապես տեսնում ենք, որ նախագահ Թրամփը և նրա թիմը խնդիր լուծողների թիմ են, մարդիկ, որոնք արդեն շատ արագ, շատ արդյունավետ և շատ հաջողությամբ են լուծել մի շարք մեծ խնդիրներ», - ասել է Դմիտրիևը:
Ուկրաինան և Եվրոպան հանդիպմանը հրավիրված չեն: Ուկրաինայի նախագահ Վլադիմիր Զելենսկին հայտարարել է, որ չի ճանաչի որևէ պայմանավորվածություն, որը ձեռք է բերվել առանց Կիևի մասնակցության:
Եվրոպացիներն էլ երեկ Փարիզում արտահերթ հանդիպում անցկացրին՝ հետագա քայլերը որոշելու: Կոնկրետ որոշումների մասին չի հայտարարվել, սակայն բոլորը համակարծիք էին՝ Կիևին անվտանգության հուսալի երաշխիքներ պետք է տրվեն, Եվրոպան ավելի շատ պետք է ծախսի իր սեփական պաշտպանության վրա, բայց որ ամենակարևորն է՝ ԵՄ-ն և ԱՄՆ-ն պետք է միասնական լինեն։
«Ես պատրաստ եմ դիտարկել բրիտանական ուժեր ուղարկելու հնարավորությունը՝ մյուսների հետ միասին, եթե լինի կայուն խաղաղության համաձայնագիր: Սակայն, պետք է աջակցություն լինի ԱՄՆ-ից, քանի որ ԱՄՆ-ի անվտանգության երաշխիքները Ռուսաստանին արդյունավետ կերպով զսպելու միակ միջոցն է», - ասել է Մեծ Բրիտանիայի վարչապետ Քիր Սթարմերը:
Նույնն է պնդել նաև Գերմանիայի Կանցլերը։ Եվրոպան ողջունում է, որ բանակցություններ են ընթանում խաղաղության շուրջ, սակայն դա չի նշանակում, որ այդ խաղաղությունը պետք է պարտադրվի Ուկրաինային, ասել է Օլաֆ Շոլցն՝ ընդգծելով, որ դրան դժվար կլինի հասնել, եթե Եվրոպան ու Ամերիկան միասնական չլինեն:
«Եվրոպայի և ԱՄՆ-ի միջև չպետք է լինի անվտանգության և պատասխանատվության բաժանում: Այսինքն՝ ՆԱՏՕ-ն հիմնված է այն սկզբունքի վրա, որ մենք միշտ գործում ենք միասին և կիսում ենք ռիսկը՝ դրանով իսկ ապահովելով մեր անվտանգությունը։ Սա չպետք է կասկածի տակ դրվի, և սա նույնպես պետք է հիշել», - ասել է Շոլցը:
Երեկվա հավաքից հետո հստակ էր, որ եվրոպական երկրների միջև դեռ չկա համաձայնություն՝ Ուկրաինա զորք ուղարկելու հարցում։ Բացի այդ, Եվրամիության ոչ բոլոր անդամներն էին երեկ հրավիրվել Փարիզ, ինչը հավելյալ դժգոհություններ է առաջացրել մի փուլում, երբ Եվրոպան փորձում է միասնական լինել։
Եվրահանձնաժողովի նախագահը Ռուսաստանի և Ուկրաինայի հարցերով ԱՄՆ հատուկ բանագնաց Քիթ Քելլոգի հետ հանդիպմանն այսօր ասել է, որ ԵՄ-ն պատրաստ է աշխատել ԱՄՆ-ի հետ՝ ուկրաինական հակամարտությունը կարգավորելու համար։
Ուրսուլա ֆոն դեր Լեյենն ընդգծել է՝ ցանկացած համաձայնագիր պետք է հարգի Ուկրաինայի անկախությունը, ինքնիշխանությունը և տարածքային ամբողջականությունը և դա պետք է ամրապնդվի անվտանգության հուսալի երաշխիքներով։
