Գյումրիի նախկին քաղաքապետ Սամվել Բալասանյանի նկատմամբ հետախուզում է հայտարարվել, նրա նկատմամբ խափանման միջոց է ընտրվել կալանքը:
70-ամյա նախկին պաշտոնյան մեղադրվում է փողերի լվացման ու պաշտոնական լիազորությունների չարաշահման համար:
Մեղադրանքն առնչվում է Գյումրիի պատմական «Սև բերդ» ամրոցի հարակից հողամասերի օտարմանը, որի շրջանակներում տնային կալանքի տակ է նախկին քաղաքապետի որդին՝ գործարար Խաչատուր Բալասանյանը: Նա, ըստ իրավապահների, կիրառված կոռուպցիոն մեխանզիմների շնորհիվ դարձել է հոր օտարած հողատարածքների վերջնական գնորդը:
Բալասնայանների ընտանիքի շահերի պաշտպան Տիգրան Գրիգորյանն «Ազատության» հետ զրույցում նշեց, որ իր վստահորդները մեղադրանքները չեն ընդունում:
Ինչ վերաբերում է Սամվել Բալասանայնի նկատմամբ հետախուզում հայտարարելուն, ապա պաշտպանը նշեց, որ վերջինս արտերկրում է բուժման նպատակով, և երբ առողջական վիճակը թույլ տա, կվերադառնա ու կներկայանա նախաքննական մարմին: Բալասանյանը, ըստ Գրիգորյանի, թաքնվելու պատճառ չունի։
Սամվել Բալասանյանն անցած տարեվերջից Միացյալ Նահանգներում է, որդին ձերբակալվել էր հոր մոտ մեկնելու ճանապահին՝ «Զվարթնոց» օդանավակայանում: Հենց այս քրեական գործից հետո Գյումրիի իշխող «Բալասանյան» դաշինքը ողջ կազմով հրաժարական տվեց:
