Անցած գիշեր Ռուսաստանում անօդաչու թռչող սարքերը հարձակվել են երեք գործարանի վրա, որոշ օդանավակայաններ կասեցրել են ինքնաթիռների վայրէջքն ու թռիչքը։
Ստավրոպոլի երկրամասի Բուդյոնովսկ քաղաքում ԱԹՍ-երը հարձակվել են արդյունաբերական գոտու վրա, հայտնել է նահանգապետ Վլադիմիր Վլադիմիրովը։ Astra տելեգրամյան ալիքը պարզաբանել է, որ հարձակման թիրախը «Ստավրոլեն» նավթաքիմիական գործարանն էր, որը պատկանում է «Լուկօյլ»-ին։
Astra և Shot տելեգրամյան ալիքների տվյալներով՝ Ուլյանովսկի մարզում հարված է հասցվել Նովոսպասկոյե գյուղին, որտեղ գտնվում է նավթամբար։ Մարի Էլում, ըստ Astra-ի, հարված է հասցվել Օրշանկա գյուղի գործարանին։
Հոկտեմբերի լույս 29-ի գիշերը, ըստ Դաշնային օդային տրանսպորտի գործակալության (Ռոսավիացիա) տվյալների, փակվել են նաև մի քանի ռուսական օդանավակայաններ՝ Վլադիկավկազում, Վոլգոգրադում, Գելենջիկում, Գրոզնիում, Կազանում, Կրասնոդարում, Ուլյանովսկում, Չեբոկսարիում, Պենզայում, Սարատովում, Սամարայում և Կալուգայում: Մոսկվայի Շերեմետևո և Ժուկովսկի օդանավակայանները նույնպես ժամանակավորապես փակվել են։
Ղրիմում անօդաչու թռչող սարքի հարձակումը հրդեհ է առաջացրել Սիմֆերոպոլում, ըստ Ղրիմի նահանգապետ Սերգեյ Ակսյոնովի. «Հարված է հասցվել դյուրավառ և քսանյութեր պարունակող տարայի։ Հրդեհ է առաջացել։ Զոհեր չկան»։
Ռուսաստանի իշխանությունների տվյալներով՝ անցած գիշեր ընդհանուր առմամբ խոցվել է 100 ԱԹՍ։
