3 տարի առաջ այս օրը Ռուստատանն Ուկրաինա ներխուժեց՝ սկսելով լայնածավալ ու արյունալի պատերազմ:
Ուկրաինայում հողին են հավասարեցվել բնակելի տներ, դպրոցներ ու հիվանդանոցներ. արբանյակային լուսանկարները բացահայտում են ավերածության իրական մասշտաբները:
Արևելյան Ուկրաինայի Բախմուտ քաղաքը ռուսական հարձակման արյունալի հետևանքների վկաներից է: Փրփրուն գինիներով հայտնի այս քաղաքում 70,000 մարդ էր ապրում: 2023-ի մայիսին քաղաքապետը երկու բառով նկարագրեց երբեմնի ծաղկուն տարածքը՝ «ավերակներ և մոխիր»: Պաշտոնական տվյալով՝ հիմա քաղաքում 500 մարդ է ապրում:
2022 թվականի մարտի 29. Մարիուպոլ նավահանգստային քաղաքի ավերված տներն ու տարածքները ծխում են՝ ռուսական հերթական հարվածից հետո:
Ազովի ծովի ափին գտնվող Մարիոպուլ քաղաքի դպրոցը վերանորոգվել էր 2018-ին: Քաղաքի ժամանակակից կրթական հաստատություններից էր: 2022-ի մարտի 10-ին դպրոցը ռմբակոծվեց. ավերակները տեսանելի են տիեզերքից:
Ավերված է նաև Ուկրաինայի արևելքում գտնվող Սոլեդար քաղաքը. ենթակառուցվածքները հողին են հավասարեցված:
Ռուբիժնե քաղաքը ինտենսիվ հարվածների տակ էր 2022-ի մարտին։ Նույն տարվա մայիսից քաղաքը ռուսական օկուպացիայի տակ է՝ ավերված:
Մինչև 2022 թվականի փետրվարին Ռուսաստանի ներխուժումը արևելյան Ուկրաինայի Մարյինկա քաղաքի բնակչությունը կազմում էր մոտ 9000 մարդ։ Նույն թվականի նոյեմբերին քաղաքը գրեթե ամբողջությամբ ավերվեց և դարձավ անմարդաբնակ:
486 միլիարդ դոլար գումար է անհրաժեշտ Ուկրաինան վերակառուցելու համար: Համաշխարհային բանկի, ՄԱԿ-ի ու Եվրահանձնաժողովի հաշվարկն է սա՝ 2024-ի տվյալներով։
Ուկրաինայի փոխվարչապետ Չերնիշովի խոսքով՝ արտադրողականության ներկայիս մակարդակով երկիրն ունի մինչև 4.5 միլիոն աշխատողի պակաս:
Ուկրաինայի Լուգանսկի մարզի արևելքում գտնվող Սևերոդոնեցկը 2022 թվականին ենթարկվել է մշտական ռուսական ռմբակոծությունների։ Նույն թվականի հունիսին ռուսական զորքերը կարճ ժամանակով դուրս մղվեցին քաղաքից, բայց ավելի ուշ այն վերադարձրին իրենց։
2024-ի գարնանն անցկացված հարցումների համաձայն՝ Խարկովում ու Կիևի Իրպին արվարձանում բնակիչների մեծ մասը սեփական միջոցներով է վնասված տները վերականգնել։
Ուկրաինայում ամեն 10 տնից առնվազն մեկն ամբողջովին ավերվել կամ վնասվել է ռուսական հարվածներից:
Համաշխարհային բանկի, ՄԱԿ-ի ու ԵՀ-ի՝ 2024-ի դեկտեմբերի տվյալն է սա:
Օրեխովո քաղաքում մնացել է ընդամենը մի քանի հարյուր մարդ:
2025-ին ԱՄՆ պետքարտուղար Մարկո Ռուբիոն հայտարարեց, թե Միացյալ Նահանգները ցանկանում է աջակցել Ուկրաինայի երկարաժամկետ անկախությանը՝ ներդրումներ անելով ուկրաինական տնտեսության մեջ և ստանալով մասնաբաժիններ: Ըստ Վաշինգտոնի՝ դա կօգնի վերադարձնել պատերազմի պատճառով ծախսված միլիարդավոր դոլարներն ու դրանց մի մասը ներդնել հենց երկրի վերակառուցման մեջ: ԱՄՆ-ը շարունակում է հետաքրքրված մնալ Ուկրաինայի բնական ռեսուրսներով, հատկապես՝ հազվագյուտ հողային տարրերով: