Հայաստանի և ԵԱՀԿ-ի միջև համագործակցության ընթացքը և զարգացման հեռանկարներն են քննարկել ՀՀ վարչապետ Նիկոլ Փաշինյանը և ԵԱՀԿ գլխավոր քարտուղար Ֆերիդուն Սինիրլիօղլուն Մյունխենի Անվտանգության համաժողովի շրջանակում կայացած հանդիպման ընթացքում:
Կառավարության լրատվականի փոխանցմամբ՝ Սինիրլիօղլուն ներկայացրել է կազմակերպության հետագա գործունեության առաջնահերթություններն ու ծրագրերը։ Կողմերն անդրադարձել են նաև տարածաշրջանային նշանակության հարցերի:
Կարևորվել է Հայաստանի և Ադրբեջանի միջև խաղաղության գործընթացը, որի հաջողությունն էական դեր կունենա տարածաշրջանային կայունության ապահովման գործում։
ԵԱՀԿ գլխավոր քարտուղարը վերահաստատել է կազմակերպության պատրաստակամությունը՝ աջակցելու խաղաղության և կայունության հաստատման ջանքերին, ասված է հաղորդագրությունում:
Հայաստանի վարչապետն այսօր Մյունխենում հանդիպումներ է ունեցել նաև Գերմանիայի կանցլեր Օլաֆ Շոլցի, Բունդեսթագի Գերմանիա-Հարավային Կովկաս բարեկամական խմբի նախագահ Յոհանն Վադեֆուլի, Խորվաթիայի վարչապետ Անդրեյ Պլենկովիչի, Իրաքյան Քուրդիստանի նախագահ Նեչիրվան Բարզանիի, Ֆինլանդիայի նախագահ Ալեքսանդր Ստուբի, Նորվեգիայի վարչապետ Յոնաս Գահր Ստյորեի հետ:
Մյունխենի Անվտանգության համաժողովի շրջանակում արտերկրի իրենց պաշտոնակիցների հետ հանդիպումներ են ունենում նաև պաշտպանության նախարար Սուրեն Պապիկյանն ու ԶՈՒ Գլխավոր շտաբի պետ Էդվարդ Ասրյանը։
