Թուրքիայի ոստիկանությանը պատկանող օդանավով Երևանից Անկարա են տեղափոխվել Ինտերպոլով տևական ժամանակ հետախուզվող հանցավոր խմբի անդամներ։ Հայաստանի արտաքին գործերի նախարարությունը հաղորդում է, որ հայկական կողմնը հետախուզվող անձանց երեկ արտահանձնել է թուրքական կողմին՝ արձագանքելով Ինտերպոլի Կարմիր ծանուցմամբ ներկայացված խնդրանքին։ Այլ մանրամասներ, սակայն, արտաքին քաղաքական գերատեսչությունից չեն հայտնում։
Արտահանձնմանն արձագանքել է Երևանի հետ տասնամյակներով դիվանագիտական հարաբերություններ չունեցող երկրի Արտգործնախարարությունը. պաշտոնական Անկարան շեշտում է՝ բարձր է գնահատում Հայաստանի համագործակցությունը։
«Կարծում եմ, որ սա այն քայլը չէ, որը կարող է հիմք հանդիսանալ հարաբերությունների կարգավորման համար», - նշեց թուրքագետ Նելլի Մինասյանը։
Թուրքագետն, այնուամենայնիվ, կարևորում է նման համագործակցությունը հայ-թուրքական հարաբերությունների կարգավորման ճանապարհին։ Երևանի ու Անկարայի հատուկ բանագնացներ Ռուբեն Ռուբինյանն ու Սերդար Քըլըչը 2021-ից սկսած մի քանի հանդիպում են ունեցել, անգամ պայմանավորվել ամենասեղմ ժամկետներում հայ-թուրքական սահմանը բացել երրորդ երկրների քաղաքացիների ու դիվանագիտական անձնագիր ունեցող անձանց համար։ Սակայն, մինչ այս պահը պայմանավորվածությունն այդպես էլ կյանքի չի կոչվել։ Թուրքիան պաշտպանում է այսպես կոչված «Զանգեզուրի միջանցքի» գաղափարը, հայ - թուրքական կարգավորումը պայմանավորում հայ - ադրբեջանականով:
«Այս տիպի քայլերը կարևոր են, ըստ էության, փոխադարձ ինչ-որ մթնոլորտի ձևավորման համար: Այսինքն՝ հարցերի, խնդիրների շրջանակ, որտեղ կողմերը միմյանց կարիքն ունեն ու ի վերջո աշխատանքային ինչ-որ մթնոլորտի ձևավորում, որը կարող է լինել հարաբերությունների հաստատման պայմաններից մեկը», - ասաց Մինասյանը:
Ովքեր են արտահանձնված անձինք
Երեկ արտահանձնվածների մասին որոշ մանրամասներ Թուրքիայի ներքին գործերի նախարարությունն է ներկայացրել։ Ըստ գերատեսչության՝ Էրջան Յըլմազը հետախուզման մեջ է եղել 15 տարի, նրան ձերբակալելու ավելի քան 40, իսկ 6 տարի հետախուզման մեջ գտնվող Քայմակին 10 օրդեր է ներկայացված եղել։ Ըստ թուրք իրավապահների՝ Յըլմազը հանցավոր կազմակերպության առաջնորդ է, իսկ Քայմակը՝ կազմակերպության անդամ։
«Ցանկանում եմ շնորհակալություն հայտնել Հայաստանի արդարադատության փոխնախարար պարոն Տիգրան Դադունցին, մեր Արդարադատության և Արտաքին գործերի նախարարություններին, մեր Ինտերպոլ-Եվրոպոլի դեպարտամենտին, Մաքսանենգության և կազմակերպված հանցավորության և հետախուզության դեմ պայքարի վարչության և Օրդու նահանգի հետ համագործակցության համար», - հայտարարել է Թուրքիայի ներքին գործերի նախարար Ալի Երլիքայան։
Թուրքական մամուլը գրում է, որ Յըլմազի ղեկավարած հանցավոր խումբը զենքի սպառնալիքով գումար է կորզել մարդկանցից, մոտոցիկլետներով զինված հարձակումներ է գործել գործարարների դեմ, որոնք չեն ընդունել կազմակերպությանը գումար փոխանցելու սպառնալիքները:
Յըլմազն ու Քայմակը, ըստ թուրքական աղբյուրների, առնչություն ունեն մեկ այլ՝ «Բարիշ Բոյուն» հանցավոր կազմակերպության հետ։ «Բարիշ Բոյուն» հանցավոր խումբը մեղադրվում է սպանությունների, թմրանյութերի վաճառքի, զենքի մաքսանենգության ու ավազակության կազմակերպման համար։
Ոչ թուրքական, ոչ էլ հայկական կողմը չեն հստակեցնում՝ ե՞րբ և ինչպե՞ս են հանցավոր կազմակերպության անդամները Հայաստանում հայտնվել, օդայի՞ն, թե՞ ցամաքային սահմանով են եկել: Արդյոք նրանք առնչություն ունե՞ն դեկտեմբերի 11-ին հայ-թուրքական սահմանը խախտելու հավանական դեպքի հետ։
Ազգային անվտանգության ծառայությունն անցած տարեվերջին հայտնել է, որ տեղեկություն է ստացել հավանական սահմանախախտման մասին։ Գերատեսչությունը, սակայն, անցած շաբաթներին այդպես էլ չպարզաբանեց՝ արդյոք հաստատվել՞ է սահմանախախտման դեպքը, թե՝ ոչ, կա՞ն ձերբակալվածներ։ ԱԱԾ-ից այսօր հորդորեցին գրավոր հարցում ուղարկել։
