Ռուսաստանից ավելի քան 4 մլրդ դրամի անպիտան ռազմամթերքի մատակարարման քրեական գործով մեղադրանք է առաջադրվել գեներալ-գնդապետ Մովսես Հակոբյանին։
Գլխավոր դատախազությունից հայտնում են, որ Գլխավոր շտաբի պետի ու պաշտպանության փոխնախարարի պաշտոնը զբաղեցրած Հակոբյանը մեղադրվում է պաշտոնեական անփութության համար, որն առաջացրել է խոշոր չափերի գույքային վնաս կամ այլ ծանր հետևանք։
Ինքը՝ Հակոբյանն այսօր հրաժարվեց մեկնաբանություն տալ «Ազատությանը»։ Փոխարենը նրա փաստաբան Մուշեղ Ալեքսանյանը փոխանցեց, որ գեներալ-գնդապետը չի ընդունում մեղադրանքը։ Դատախազությունից տեղեկացնում են, որ այս գործը կապ չունի անպիտան հրթիռների քրեական գործի հետ, որով մեղադրյալների շարքում դարձյալ նախկին բարձրաստիճան զինվորականներ են, այդ թվում՝ պաշտպանության նախկին նախարար Դավիթ Տոնոյանը ու Գլխավոր շտաբի նախկին պետ Արտակ Դավթյանը:
«Պարոն Հակոբյանը մեղադրանքը չի ընդունում այն պարզ պատճառով, որ իրեն մեղսագրվող արարքն իր հետ ընդհանրապես կապ չունի, իրեն մեղսագրվում է այնպիսի գործողություն, այնպիսի մեղադրանք գործողության չկատարում, որի իրավասությունն ինքը չի էլ ունեցել, իսկ այդ գործողությունը կատարված է եղել ավելի վերադաս մարմնի կողմից», - ասաց փաստաբանը:
Մինչդեռ մեղադրող դատախազ Կարեն Կարապետյանը հակառակն է պնդում՝ շեշտելով՝ զենքի մատակարարման պայմանագիրը ռուսական ընկերության հետ 2016-ին կնքել է հենց պաշտպանության փոխնախարարի պաշտոնը զբաղեցրած Հակոբյանը։ Դատախազը Հանրայինի հետ զրույցում հայտնել է, թե պայմանագրով ձեռք են բերվել հետախուզության և կրակի կառավարման շարժական ռադիոտեղորոշիչ համակարգեր։ Դրանք, ըստ դատախազության, առանց գործնական փորձարկման 2017-ին մատակարարվել են Հայաստանի ու Արցախի Զինուժի ստորաբաժանումներին։
«Սակայն դրանց առաջին իսկ կիրառության դեպքերում դրանք գործնական պայմաններում չեն կարողացել կատարել իրենց առջև դրված խնդիրները, չեն համապատասխանել իրենց մարտավարատեխնիկական բնութագրերին», - ասել է դատախազը:
Ընդ որում՝ դատախազության ներկայացմամբ՝ 2018-ին Ռուսաստանից մասնագետներ են եկել համակարգերը նորոգելու համար։ Այս դրվագով էլ զինվորական պաշտոնեական անփութության հոդվածով մեղադրանք է առաջադրվել բանակի հրթիռային զորքերի և հրետանու վարչության նախկին պետ Արմեն Հարությունյանին։ Նա ևս չի ընդունում մեղադրանքը։
«Չի ստուգել՝ վերանորոգվել են, թե ոչ վերջնական, և դրանք պիտանի են արդյոք կիրառելու համար, և ռուս մասնագետները գնացել են Հայաստանի Հանրապետությունից», - նշել է դատախազը:
Դատախազությունը երկու գեներալներից հօգուտ պետության պահանջում է բռնագանձել ավելի քան 4.3 միլիարդ դրամ: Մովսես Հակոբյանի փաստաբանն «Ազատությանն» ասաց՝ թեև իր պաշտպանյալին մեղսագրվող արարքի վաղեմության ժամկետը լրացել է, սակայն նա պատրաստվում է դատարանում ապացուցել անմեղությունը։
«Ինքը եթե մեղավոր լիներ, վաղեմությունն անցած դեպքում կարող էր օգտվել պետության կողմից տրված ..., և իր նկատմամբ քրեական վարույթը կարճվեր, բայց չենք ընդունել, որոշել ենք գնալ պայքարելու և մեր անմեղությունը հիմնավորելու ճանապարհով», - շեշտեց Մուշեղ Ալեքսանյանը:
60-ամյա Հակոբյանը մեկ այլ քրեական գործով մեղադրվում է պետական գաղտնիք հրապարակելու համար։ 4 տարի առաջ հարուցված այս գործով, սակայն, դեռ դատավճիռ չկա։ Այս մեկն առնչվում է 44-օրյա պատերազմից 10 օր անց գեներալ-գնդապետի արած հայտարարություններին։ Նոյեմբերի 19-ի ասուլիսի ընթացքում Մովսես Հակոբյանը պնդել էր, թե բանակը պահեստազորայիններով համալրելու փոխարեն կամավորներին են ուղարկել առաջնագիծ, գնվել է սխալ զինտեխնիկա, միևնույն ժամանակ իշխանություններին մեղադրել էր սպառազինության և ռազմական տեխնիկայի զարգացման պլանները փոխելու, օպերատիվ օղակն ավելացնելու ու իսկական կռվողներին կրճատելու համար: Դատական այս գործի ընթացքին ծանոթանալ հնարավոր չէ, «Դատալեքս» համակարգում այն փակ է՝ պետական գաղտնիքի պատճառաբանությամբ:
