Վարչապետ Նիկոլ Փաշինյանը շնորհավորական ուղերձ է հղել Ժոզեֆ Աունին՝ Լիբանանի նախագահի պաշտոնում ընտրվելու առիթով:
Վարչապետի աշխատակազմի լրատվականի փոխանցմամբ՝ ուղերձում մասնավորապես ասված է. - «Հայաստանի ժողովրդի և անձամբ իմ անունից սրտանց շնորհավորում եմ Ձեզ Լիբանանի Հանրապետության նախագահի պաշտոնում ընտրվելու կապակցությամբ: Համոզված եմ, որ Ձեր առաջնորդությամբ՝ մարտահրավերներով լի այս ժամանակաշրջանում Լիբանանը կվերագտնի կայունության, խաղաղության ու բարեկեցության ուղին: Հայաստանն ու Լիբանանն ունեն բարեկամության հարուստ ավանդույթներ՝ հիմնված պատմամշակութային սերտ կապերի և երկու ժողովուրդների միջև առկա փոխադարձ հարգանքի վրա»:
«Վերահաստատում եմ Հայաստանի աջակցությունը Լիբանանի տարածքային ամբողջականությանը, ինքնիշխանությանն ու սահմանների անձեռնմխելիությանը: Վստահեցնում եմ, որ Հայաստանը շարունակելու է իր աջակցությունը Լիբանանում խաղաղության հաստատմանն ուղղված միջազգային ջանքերին՝ մասնավորապես ՅՈՒՆԻՖԻԼ-ի շրջանակներում հայկական խաղաղապահ զորախմբի գործուն մասնակցությամբ», - գրել է Փաշինյանը:
Լիբանանի զինված ուժերի հրամանատար գեներալ Ժոզեֆ Աունը երկրի նախագահ ընտրվեց հունվարի 9-ին՝ խորհրդարանում երկու փուլով անցկացված քվեարկությամբ:
