Ռուսաստանի վարչապետ Միխայիլ Միշուստինը հոկտեմբերի 1-ին աշխատանքային այցով կլինի Հայաստանում, հայտնում է Ռուսաստանի վարչապետի գրասենյակը։
Ըստ հաղորդման՝ Միշուստինը Երևանում կմասնակցի Եվրասիական միջկառավարական խորհրդի 40-րդ և Եվրասիական տնտեսական ֆորումի լիագումար նիստերին։
Նշվում է, որ Հայաստանի, Բելառուսի, Ղազախստանի և Ղրղըզստանի իր գործընկերների հետ Միշուստինը կքննարկի «Եվրասիական տնտեսական միության շրջանակներում ինտեգրման խորացման հրատապ խնդիրները»։
Ուշադրության կենտրոնում, մասնավորապես, կլինեն ներքին շուկայի գործունեության, արդյունաբերության, տրանսպորտի, մաքսային, գյուղատնտեսության և էներգետիկայի ոլորտներում փոխգործակցության զարգացման հարցերը։
ՏԱՍՍ-ը նշում է, որ միջկառավարական խորհրդի նիստին կլինեն նաև ԵԱՏՄ դիտորդ երկրների՝ Կուբայի և Ուզբեկստանի ներկայացուցիչները, ինչպես նաև հրավիրված հյուրեր։
Ակնկալվում է նաև, որ ԵԱՏՄ երկրների վարչապետերը կդիտարկեն ԵԱՏՄ շրջանակներում արդյունաբերական համագործակցության հիմնական ուղղությունները մինչև 2030 թվականը։
Եվրասիական միջկառավարական խորհրդի աշնանային հանդիպումներն ավանդաբար անցկացվում են Հայաստանում, և Միշուստինը դրանց մասնակցում է 2020 թվականից վարչապետ նշանակվելուց ի վեր։ Խորհրդի վերջին նիստն անցկացվել է Բելառուսում՝ հունիսին։
Եվրասիական տնտեսական միությանն անդամակցում են Ռուսաստանը, Հայաստանը, Բելառուսը, Ղազախստանը և Ղրղըզստանը: Այս տարվա հունվարի 1-ին ԵԱՏՄ նախագահությունը Ռուսաստանից անցավ Հայաստանին։ Ռուսաստանի ու ՀԱՊԿ-ի հետ հարաբերությունների սրման ֆոնին Հայաստանը հայտարարել է, որ ԵԱՏՄ-ն տնտեսական ասոցիացիա է, որը չպետք է ունենա քաղաքական, առավել ևս՝ աշխարհաքաղաքական օրակարգ։ Ընդգծելով, որ Հայաստանը դիվերսիֆիկացնում է իր արտաքին և անվտանգային քաղաքականությունը՝ Երևանը նաև նշել է, որ ԱՄՆ-ի և Եվրամիության հետ Հայաստանի համագործակցությունը ուղղված չէ ԵԱՏՄ-ի դեմ։
Հայաստան այցից առաջ Միշուստինն այսօր կմեկնի Թեհրան՝ հանդիպելու Իրանի նախագահ Մասուդ Փեզեշքիանի հետ։
