Կառավարությունում այսօր մեկնարկել է Հակակոռուպցիոն կոմիտեի նախագահի թեկնածուների մրցույթը։
Կոռուպցիոն հանցագործությունները քննող կառույցի ղեկավարի թափուր պաշտոնի համար չորս թեկնածու է պայքարում՝ Կարեն Բատիկյանը, Արտաշես Մայիլյանը, Արթուր Նահապետյանը, Պետրոս Մարտիրոսյանը։
Կարեն Բատիկյանը փաստաբան է: Մինչ այդ երկար տարիներ աշխատել է քննիչ ու դատախազ:
Արթուր Նահապետյանը Քննչական կոմիտեի նախագահի տեղակալն է։ Նա այս պաշտոնին նշանակվել է ընդամենը մեկ ամիս առաջ: Մինչ այդ Վերաքննիչ հակակոռուպցիոն դատարանի դատավոր է եղել:
Արտաշես Մայիլյանը քննիչ է Հակակոռուպցիոն կոմիտեում, նա քննել է երրորդ նախագահ Սերժ Սարգսյանի քրեական գործը:
Պետրոս Մարտիրոսյանը, վարչապետի աշխատակազմից է, ղեկավարում է տեսչական մարմինների համակարգման գրասենյակը: Մինչ այդ դատախազ է աշխատել:
Այսօր ավարտվեց Կարեն Բատիկյանի հարցազրույցը: Բոլոր թեկնածուներին լսելուց հետո միայն մրցույթն անցկացնող խորհուրդը հաղթածների ցանկը կուղարկի Կառավարություն: Առավելագույն միավորներ հավաքած թեկնածուներից մեկին էլ Կառավարությունը կնշանակի Հակակոռուպցիոն կոմիտեի ղեկավար:
Հակակոռուպցիոն կոմիտեի նախագահի պաշտոնը թափուր է անցած նոյեմբերից, երբ վարչապետ Փաշինյանը SMS-ով հորդորեց կոմիտեի ղեկավար Սասուն Խաչատրյանին հրաժարական տալ:
