«Չեմ հավատում ԱՄՆ-ի և Ռուսաստանի համաձայնեցրած հրադադարին», - Le Figaro-ի հետ զրույցում ասել է Ֆրանսիայի նախագահ Էմանյուել Մակրոնը՝ պատմելով Ուկրաինայում այլընտրանքային խաղաղության ծրագրի մասին։
Ֆրանսիան և Մեծ Բրիտանիան առաջարկում են մեկամսյա հրադադար «օդում, ծովում և էներգետիկ ենթակառուցվածքների վրա»։ Սակայն հրադադարը չի ազդի գետնի վրա ռազմական գործողությունների վրա, ասել է Մակրոնը նշելով, որ եթե զինադադար լինի, շատ դժվար կլիներ ստուգել, թե արդյոք այն պահպահնվում է շփման գծի ողջ երկայնքով։
Ծրագրի երկրորդ կետն, ըստ Մակրոնի, ենթադրում է խաղաղության հաստատումից հետո եվրոպացի խաղաղապահների տեղակայում Ուկրաինայում։
«Առաջիկա շաբաթներին այնտեղ եվրոպական զորքեր չեն լինի։ Պետք է հասկանալ, թե ինչպես ենք օգտագործելու այդ ժամանակը՝ զինադադարի հասնելու համար։ Բանակցությունները հնարավոր է մի քանի շաբաթ տևեն։ Իսկ երբ խաղաղության համաձայնագիր ստորագրվի, կսկսվի տեղակայումը», - ասել է Ֆրանսիայի նախագահը։
Հարցին, թե ինքը տեղյա՞կ է այս ծրագրից, Ուկրաինայի նախագահ Վլադիմիր Զելենսկին պատասխանել է․ - «Ես ամեն ինչից տեղյակ եմ»։
Ավելի վաղ Մեծ Բրիտանիայի վարչապետ Քիր Սթարմերը հայտարարել էր, որ Մեծ Բրիտանիան և Ֆրանսիան կաշխատեն Ուկրաինայի հետ խաղաղության համաձայնագրի վրա և այն կներկայացնեն Դոնալդ Թրամփին։
Նա հույս էր հայտնել, որ եվրոպական «ցանկացողների կոալիցիան» կմիավորվի Կիևին աջակցելու համար, ապա հավելել, որ ցանկացած հրադադար պետք է աջակցի Միացյալ Նահանգները՝ կանխելու Ռուսաստանի նախագահ Վլադիմիր Պուտինի նոր ներխուժումը Ուկրաինա:
Սթարմերը պնդել էր, որ Ուկրաինայում խաղաղության համաձայնագիրը կաշխատի միայն այն դեպքում, եթե հնարավոր Եվրոպական խաղաղապահ ուժերը անվտանգության երաշխիքներ ստանան Միացյալ Նահանգներից:
