Խախտելով հնգօրյա լռությունը՝ Գյումրիի արտահերթ ընտրություններում երրորդ տեղը զբաղեցրած Մարտուն Գրիգորյանն այսօր հայտարարեց՝ իր առաջնորդած «Մեր քաղաքը» դաշինքը անհրաժեշտ քվեներով կաջակցի Կոմկուսի թեկնածու Վարդան Ղուկասյանին, որպեսզի վերջինս քաղաքապետ ընտրվի: Ավագանու նիստում քաղաքապետ ընտրվելու համար առնվազն 17 ձայն է պետք, ու քանի որ Ղուկասյանն արդեն ունի մյուս երկու ընդդիմադիր ուժերի աջակցությունը, նրան ևս չորս ձայն էր պակասում, որը փաստացի կապահովի Գրիգորյանի դաշինքը:
«Քարոզարշավի ընթացքում ես բացահայտ ասել եմ և միակն եմ եղել, որ խոսել եմ ինչ է լինելու ընտրություններից հետո, եթե քաղաքապետ ընտրվի Վարդան Ղուկասյանը։ Մնում եմ նույն համոզմունքին, որ նա ամենախոցելի թեկնածուն է` քրեական գործերով պայմանավորված։ Թե ի՞նչ կլինի հետո ու ինչպես կվարվեն տվյալ մարդու հետ՝ լավ հիշեք այս օրը։ Գյումրին կտանե՞ն Վանաձորի ճանապարհով, թե ոչ՝ տա Աստված, որ սխալված լինեմ», - Ֆեյսբուքում գրել է Գրիգորյանը:
Նա նկատի ունի Վանաձորի նախկին քաղաքապետ Մամիկոն Ասլանյանին, որը 2021-ին թեև ամենաշատ ձայներն էր ստացել, բայց քաղաքապետարան վերադառնալ այդպես էլ չկարողացավ, քանի որ ընտրություններից մի քանի օր անց կոռուպցիոն մեղադրանքներով բանտում հայտնվեց:
Մարտուն Գրիգորյանը նաև նշում է, որ այս վտանգների մասին զգուշացրել է Ղուկասյանին աջակցող մյուս ընդդիմադիր թեկնածուներին՝ Ռուբեն Մխիթարյանին ու Կարեն Սիմոնյանին։ Ընդդիմադիր պատգամավորը նաև քննադատում է նրանց՝ նշելով, որ Ղուկասյանին սատարելու մասին իրենց շտապողականությամբ անհնարին դարձրեցին այլընտրանքային ու ավելի քիչ խոցելի տարբերակ գտնելու ճանապարհը, իրեն էլ ստիպեցին կայացնել մի որոշում, որին սկզբունքորեն դեմ է.
«Իմ դիրքորոշմամբ, օրինակ՝ Ռուբենին կամ Կարենին կարող էինք ընտրել քաղաքապետ՝ 4 թեկնածուներիս համատեղ քննարկման և համագործակցության արդյունքում։ Եվ սա կդառնար ամբողջական իշխանական համակարգի փլուզման իրական մեկնարկը։ Իրենց որոշումով պայմանավորված ունենք այս իրավիճակը, որի մասին խոսելն էլի ուշ չէ»։
Ղուկասյանին սատարող «Իմ հզոր համայնք» դաշինքի առաջնորդ Ռուբեն Մխիթարյանն այս քննադատությանը չի արձագանքել, Ֆեյսբուքում միայն գրել է, թե Գյումրիում ընդդիմությունը ոչ մեկին թույլ չտվեց «պղտորել ջրերը» և ամենակարևորը՝ «մենք բոլորս ցույց տվեցինք, որ կարող ենք առաջնորդվել ՀԱՆՈՒՆԻ համար»:
Իսկ ավագանի անցած մյուս ընդդիմադիր ուժի՝ « Մայր Հայաստան»-ի ցուցակը գլխավորող Կարեն Սիմոնյանը չի ընդունում քննադատությունը:
«Մենք առաջինն ենք եղել, որ ընտրությունների հաջորդող ժամերին հայտարարություն ենք տարածել, որ միանում ենք ընդդիմությանը, ապահովում ենք քվեներ, որպեսզի իշխանազրկվի «Քաղաքացիական պայմանագիր»-ը: Էնտեղ չկա խոսք՝ ում ես աջակցում, ում հետ ես դաշինք կազմում, չկա որևիցե անուն-ազգանուն անձի, և եթե չեն լսել էդ բանը և մեղադրում են մեզ ինչ-որ բանի մեջ, ես չեմ ընդունում դա: Իմ կարծիքով՝ փոխանցել ենք էդ մեսիջը, որ «գնդակը ձեր դաշտում է», - «Ազատության» հետ զրույցում ասաց Սիմոնյանը:
Ի՞նչ վտանգների մասին է զգուշացնում Մարտուն Գրիգորյանը. 13 տարի Գյումրին ղեկավարած ու դարձյալ նույն պաշտոնին հավակնող Վարդան Ղուկասյանը քրեական գործերի պակաս չունի: Մեղադրվում է պաշտոնական լիազորությունների չարաշահման, ապօրինի հարստացման համար: Նրա խափանման միջոցը մինչ օրս չբացակայելու ստորագրությունն է եղել: Բայց օրերս Դատախազությունը Ղուկասյանին վերագրվող մի ձայնագրության հետքերով վարույթ հարուցեց հավաքին մասնակցելուն հարկադրելու ու նյութապես շահագրգռելու հոդվածով: Իրավապահները, սակայն, դեռ չեն ասում՝ արդյոք Ղուկասյանին նոր մեղադրանք կառաջադրեն ու կձերբակալեն, թե՞ ոչ:
Ինքը՝ Գյումրիի նախկին քաղաքապետը իր ձերբակալությունը ավելի վաղ չէր բացառել, ու դրա համար, ասել էր, փոխքաղաքապետի պաշտոնը ոչ մեկին չի տա. - «Եթե ինձ ձերբակալեն, ինքըստինքյան փոխքաղաքապետը ինքը վերցնում է իր վրա, ստանձնում է և ինքը դառնում է քաղաքապետ: Այ դրա համար ես, եթե էդ պահը մենք դա բան ենք անում, թե չէ միանշանակ, միանշանակ ես խնդիր չունեմ աշխատելու հետ կապված», - հայտարարել էր Ղուկասյանը:
Մարտուն Գրիգորյանը, որ սպանությամբ ուղեկցված ընտանեկան ու քաղաքական վաղեմի հակամարտություն ունի Ղուկասյանի հետ, հատուկ ընդգծում է, որ Գյումրիի նախկին քաղաքապետին սատարելու որոշումը իր համար ծանր է եղել, ու դա անում է «առանց որևէ պաշտոնի, ակնկալիքի ու որևէ պայմանավորվածության»:
Բայց և շեշտում է՝ իր կայացրած որոշման արդյունքում ընտրություններում 36 տոկոս ստացած «Քաղաքացիական պայմանագիր»-ը Գյումրիում այլևս իշխանություն չէ: Միաժամանակ զգուշացնում է՝ այսուհետ ևս Գյումրիում «ամեն ինչ կախված է լինելու «Մեր քաղաքը» դաշինքի քվեարկությունից»: Նա, սակայն, չի հստակեցնում՝ արդյոք վայր է դնելու պատգամավորի մանդատը ու տեղափոխվելու է Գյումրիի ավագանի, թե՞ կմնա խորհրդարանում:
Ի դեպ, Գրիգորյանի որոշմանը մեկը մյուսի ետևից սկսեցին արձագանքել Գյումրիում ամենաշատ ձայները ստացած, բայց իշխանությանը գալ չկարողացած «Քաղաքացիական պայմանագրից»: Օրինակ, կուսակցության վարչության անդամ Վահագն Ալեքսանյանը գրել է. - «Լավագույնը, ինչ կարող է Հայաստանին առաջարկել Սերժաքոչարյանը, դա Վարդան Ղուկասյանն է»:
Վարչապետի գյումրեցի խոսնակն էլ, թե ընդդիմադիր ուժերը «իշխանազավթում էին տենչում, և տերերի ցուցմամբ պատրաստ եղան Գյումրին դնել զոհասեղանին»:
Նրանց իրենց հերթին արձագանքել է Գյումրիի ավագանի չանցած «Եվրաքվե» դաշինքի թեկնածու Լևոն Բարսեղյանը՝ ՔՊ-ականներին խորհուրդ տալով կամ լռել, կամ էլ ելույթները սկսել այս նախադասությամբ. -«Քաղաքացիական պայմանագիր» կուսակցությունը միայն այսօր ժամը 15:10-ի կողմերը ընկալեց, թե ինչեր չի արել անցած 7 տարիների ընթացքում»:
