ՄԱԿ-ի Անվտանգության խորհուրդն այսօր կքննարկի Կիևի «Օխմադետ» մանկական հիվանդանոցին ռուսական հարվածների հետևանքները, Reuters-ին հայտնել են դիվանագիտական աղբյուրները։
Անվտանգության խորհրդի նիստը կգումարվի Բրիտանիայի, Ֆրանսիայի, Էկվադորի, Սլովենիայի և ԱՄՆ-ի խնդրանքով։
«Անվտանգության խորհրդում մենք կդատապարտենք Ռուսաստանի վախկոտ հարձակումը հիվանդանոցի վրա»,- X-ում գրել է ՄԱԿ-ում Մեծ Բրիտանիայի մշտական ներկայացուցիչ Բարբարա Վուդվորդը։
Ուկրաինան երեկ առավոտյան զանգվածային հրթիռակոծության է ենթարկվել։
Ուկրաինայի նախագահ Վլադիմիր Զելենսկին հայտարարել է, որ խաղաղ բնակչության վրա զանգվածային հրթիռային հարձակման հետևանքով զոհերի թիվը հասել է 37-ի, մահացածների թվում երեք երեխա կա։ Եվս 170 մարդ, այդ թվում՝ 13 երեխա, վիրավոր է։
«Ընդհանուր առմամբ վնասվել է գրեթե 100 օբյեկտ՝ մանկական հիվանդանոց, սովորական տներ, մանկապարտեզներ, ծննդատուն, քոլեջ, բիզնես կենտրոն»,- ասել է Ուկրաինայի ղեկավարը։
ՄԱԿ-ի գլխավոր քարտուղար Անտոնիո Գուտերեշը խստորեն դատապարտել է ռուսական հարվածները։
«Միջազգային մարդասիրական իրավունքով արգելված են հարձակումները խաղաղ բնակչության և քաղաքացիական օբյեկտների վրա։ Ցանկացած նման հարձակում անընդունելի է և պետք է անհապաղ դադարեցվի», - հայտարարել է Գուտերեշի խոսնակը։
Ռուսաստանի պաշտպանության նախարարությունը չի ստանձնել քաղաքացիական օբյեկտներին հերթական հարվածի պատասխանատվությունը և պնդել է, թե հեռահար ճշգրիտ զենքերով խմբակային հարված է հասցվել Ուկրաինայի ռազմական արդյունաբերության օբյեկտներին և Ուկրաինայի զինված ուժերի ավիացիոն բազաներին։
Ավելին, Մոսկվան պնդել է, թե իբր լուսանկարներն ու տեսանյութերը հաստատում են, որ ավերածությունները «քաղաքի ներսում զենիթահրթիռային համակարգից արձակված ուկրաինական հակաօդային պաշտպանության հրթիռի անկման հետևանք են»:
Ուկրաինայի հատուկ ծառայությունները, մինչդեռ, պնդում են, թե հայտնաբերել են մանկական հիվանդանոցին հարվածած ռուսական X101 հրթիռի բեկորները:
