Քննչական կոմիտեի նախագահ Արթուր Պետրոսյանը վստահեցրել է, որ օբյեկտիվ քննություն կանցկացնեն` բացահայտելու Տիգրան Ուլուբաբյանին առերևույթ խոշտանգելու գործը, Քննչականում երեք ժամ տևած հարցաքննությունից հետո ասաց արցախցի երիտասարդի փաստաբանը:
Ռոման Երիցյանի փոխանցմամբ՝ Արթուր Պողոսյանը նշել է, որ այս պահին Ոստիկանության Լոռու մարզային վարչության պետին և նրա հինգ աշխատողներին ձերբակալելու հիմքեր չկան:
Վաղը Քննչականում նախատեսվում են Ուլուբաբյանի և երկու ոստիկանների առերեսումները:
Այսօրվա հարցաքննության ժամանակ արցախցի երիտասարդն իրեն խոշտանգողներից երկուսի, այդ թվում` մարզային վարչության պետի անունն է տվել:
Փաստաբանը հայտնեց նաև, որ դատաբժիշկը եզրակացություն է տվել՝ ըստ էության հիմնավոր չհամարելով Տիգրան Ուլուբաբյանի ստացած վնասվածքները։
Ցուցարարները փակել էին Մամիկոնյանց փողոցը՝ պահանջելով ձերբակալել ոստիկաններին։ Որոշ ժամանակ փողոցի վերստին բացվեց։
Դեպքը տեղի է ունեցել Վանաձորում մարտի 14-ին: Քրեական գործը հարուցվել է չորս օր անց՝ մեծ աղմուկից հետո: Բայց մինչ օրս հստակ չէ, թե ինչ քննչական գործողություններ են արել իրավապահները, որ հայտնաբերեն Ոստիկանության Լոռու մարզային վարչության այն աշխատողներին, որոնք 29-ամյա արցախցուն կանչել են զրույցի ու, ինչպես Տիգրան Ուլուբաբյանն է պնդում, ստիպել, որ իր վրա վերցնի բարեկամի տնից կատարված գողությունը:
