Այսօր առավոտյան Կիևում հրթիռային և անօդաչու թռչող սարքերի հարձակման հետևանքով զոհվել է չորս մարդ, վիրավորվել՝ առնվազն 20-ը։
Ուկրաինայի իշխանությունների հաղորդմամբ՝ սա ավելի քան երեք տարի շարունակվող պատերազմի ընթացքում տեղի ունեցած ամենազանգվածային և ինտենսիվ հարձակումներից մեկն էր, որը շարունակվել է մի քանի ժամ․ ռուսական կողմը, ըստ հաղորդումների, օգտագործել է թևավոր հրթիռներ և կամիկաձե անօդաչու թռչող սարքեր։
Կիևի ռազմական վարչակազմի ղեկավար Տիմուր Տկաչենկոն ասել է, որ անօդաչու թռչող սարքերը հարվածել են քաղաքի արևելյան կողմում գտնվող բարձրահարկ բնակելի շենքի վերին հարկերին և հրդեհ է բռնկվել։
Ուկրաինայի ռազմաօդային ուժերը հայտարարել են, որ քաղաքը թիրախավորվել է անօդաչու թռչող սարքերով և «Կալիբր» թևավոր հրթիռներով։ Հարձակման ժամանակ լսվել է ռուսական կամիկաձե անօդաչու թռչող սարքերի բզզոցի ձայնը՝ ուղեկցվելով ուկրաինական հակաօդային կրակի ձայներով, հաղորդում է Reuters-ը։
ԱՄՆ նախագահ Դոնալդ Թրամփը հունիսի 4-ին հայտարարել էր, որ Ռուսաստանի նախագահ Վլադիմիր Պուտինը խոստացել է պատասխանել ռուսական ռազմական օդանավակայանների վրա հարձակմանը:
Ուկրաինայի անվտանգության ծառայությունը հարձակումն իրականացրել էր հունիսի 1-ին, իսկ ավելի ուշ հայտարարել է, որ խոցվել է ավելի քան 40 ռմբակոծիչ։
