Կիևի և Վաշինգտոնի ներկայացուցիչները պայմանավորվել են «մոտ ապագայում» հանդիպել, Տելեգրամի իր էջում գրել է Ուկրաինայի նախագահի գրասենյակի ղեկավար Անդրեյ Երմակը՝ տեղեկացնելով, որ հեռախոսազրույց է ունեցել ԱՄՆ նախագահ Դոնալդ Թրամփի ազգային անվտանգության հարցերով խորհրդական Մայք Ուոլցի հետ։
«Քննարկել ենք արդար և կայուն խաղաղությանն ուղղված հետագա քայլերը, մտքեր ենք փոխանակվել նաև երկկողմ հարաբերությունների շրջանակներում անվտանգության հարցերի և դիրքորոշումների համակարգման վերաբերյալ, ինչպես նաև պայմանավորվել ենք մոտ ապագայում մեր թիմերի հանդիպման շուրջ՝ շարունակելու այս կարևոր աշխատանքը», - գրել է Երմակը։
"РБК-Украина"-ն, վկայակոչելով Ուկրաինայի նախագահ Վլադիմիր Զելենսկուն, նշում է, որ ուկրաինական և ամերիկյան թիմերը մարտի 5-ին սկսել են աշխատել հանդիպում կազմակերպելու ուղղությամբ։
«Դրական տեղաշարժ կա, հուսով ենք հաջորդ շաբաթ առաջին արդյունքները կլինեն», - ըստ լրատվամիջոցի՝ ասել է Զելենսկին։
Ուոլցն ավելի վաղ ասել էր, որ ԱՄՆ-ը և Ուկրաինան քննարկում են հանդիպման տեղն ու օրը, ինչպես նաև հանդիպման մասնակիցների շրջանակը։
Ուկրաինային ամերիկյան ռազմական օժանդակության կասեցումից մեկ օր անց Վլադիմիր Զելենսկին X-ում վերահաստատել էր Ուկրաինայի հավատարմությունը խաղաղությանը՝ ընդգծելով՝ թեև փետրվարի 28-ին Սպիտակ տանը ԱՄՆ նախագահ Դոնալդ Թրամփի հետ հանդիպումն «այնպես չի անցել, ինչպես ակնկալվում էր», սակայն Կիևը պատրաստ է «որքան հնարավոր է շուտ» նստել բանակցությունների սեղանի շուրջ՝ կայուն խաղաղության հասնելու համար։ Թրամփն էլ ասել է, որ գնահատում է, Զելենսկու քայլը։
