ԱՄՆ նախագահ Դոնալդ Թրամփը Վաշինգտոնում, Ֆրանսիայի նախագահ Էմանյուել Մակրոնի հետ հանդիպմանը, հայտարարել է, որ կարող է մի քանի շաբաթվա ընթացքում վերջ դրվել Ուկրաինայի դեմ պատերազմին։
Նա նշել է, որ այս կամ հաջորդ շաբաթ Սպիտակ տանը կարող է հանդիպել Ուկրաինայի նախագահ Վլադիմիր Զելենսկու հետ՝ ստորագրելու հանածոների հետ կապված գործարքը՝ ընդգծելով, որ ԱՄՆ-ն ու Ուկրաինան «շատ մոտ են վերջնական համաձայնության»։
Սպիտակ տան ղեկավարը նաև ասել է, որ պատրաստ է հարմար պահի այցելել Մոսկվա, սակայն մայիսի 9-ը կարող է շատ վաղ լինել։
Ավելի վաղ ֆրանսիական Le Point ամսագիրը՝ հղում անելով անանուն աղբյուրների, հայտնել էր, որ Թրամփը ներկա կլինի Մոսկվայում մայիսի 9-ին կայանալիք շքերթին, ապա տեղի կունենա Թրամփ-Պուտին հանդիպումը։ ԱՄՆ նախագահն էլ արձագանքել էր, որ չի պատրաստվում մայիսի 9-ին մեկնել Մոսկվա։
Թրամփն ասել է, որ չգիտի, թե երբ կհանդիպի Ռուսաստանի նախագահի հետ, բայց վաղ թե ուշ դա տեղի կունենա։
Հարցին՝ արդյո՞ք որպես պատերազմի ավարտի գործարքի մաս Ուկրաինան պետք է տարածքներ զիջի Ռուսաստանին, Թրամփը պատասխանել է. «Կտեսնենք, բանակցությունները նոր են սկսվում»։
