Գյումրիի քարոզարշավի ու ընտրությունների ողջ ընթացքին հետևած դիտորդական խմբերն արձանագրում են՝ մասնակից քաղաքական ուժերը կիրառել են ատելության խոսք, վիրավորանք ու անձնապես թիրախավորել միմյանց:
«Ականատես» դիտորդական առաքելության ներկայացուցիչ Մարիամ Հովեյանն «Ազատության» հետ զրույցում նկատեց՝ այդ շղթան բացեց վարչապետ Նիկոլ Փաշինյանը. «Երբ վարչապետը մրցակիցներին անվանեց առնետներ, և դրան հետևեց պատասխան համարժեք, ու այսպես ձնագնդի էֆեկտով ատելության խոսքը քարոզարշավի ամբողջ ընթացքում բազմապատկվեց»:
Դիտորդներն արձանագրել են՝ մասնակից ուժերից «Դեմոկրատական այլընտրանք» կուսակցության հիմնադիր Սուրեն Սուրենյանցը վիրավորական մի շարք արտահայտություններ է թույլ տվել իշխանական թեկնածուի հասցեին: «Մայր Հայաստան» դաշինքի ավագանու թեկնածու Մհեր Խաչատրյանն էլ Ինստագրամի իր էջում գրել է. «Հա՞յ ես, թե՞ ՔՊ-ական»:
Իսկ ահա «Իմ հզոր համայնք» կուսակցության նախընտրական ծրագրում իշխող ՔՊ-ն նույնացվել էր «թափառող շների» ու «կրծողների» հետ: Հետո այդ կուսակցության ցուցակը գլխավորող Ռուբեն Մխիթարյանը սոցցանցերի իր էջում ատելության քարոզի տարրեր պարունակող տեսահոլովակ է տեղադրել: Կոմունիստական կուսակցության ցուցակն առաջնորդած Վարդան Ղուկասյանն էլ թիրախավորել էր ԼԳԲՏ անձանց և ոչ միայն:
Դիտորդական առաքելության ներկայացուցիչ Մարիամ Հովեյանն ասում է՝ և սա իրենց արձանագրումների մի մասն է միայն. «Առաջամարտիկներն, իհարկե, այս մրցավազքում Վարդան Ղուկասյանն ու Ռուբեն Մխիթարյանն էին: Սպեցիֆիկան ատելության խոսքի այն է, որ յուրաքանչյուր թեկնածու իր հասցեին լսելով արժանապատվությունը նսեմացնող, հավասարության իրավունքը ոտնահարող խոսքեր, հակված է համարժեք արձագանք տալու, և դրանով է, որ այս երևույթը ռիսկ ունի իր մեջ բազմապատկվելու և հրահրելու հետագայում նաև ֆիզիկական կոմ հոգեբանական բռնություն»:
Հովեյանը հիշեցնում է՝ ընտրական պրոցեսը դեռ չի ավարտվել, մինչև տեղական իշխանությունների վերջնական ձևավորումը հետընտրական զարգացումները նույնպես ընտրության մաս են համարվում: Դիտորդի պնդմամբ՝ կարևոր է, որ ընտրված թեկնածուները շարունակեն պահպանել բարեվարքության կանոնները:
Գյումրու ընտրություններում ընդդիմադիր ուժերից ամենաշատ ձայները հավաքած Վարդան Ղուկասյանն, օրինակ, ընտրությունների հաջորդ օրը կրկին թիրախավորել էր ԼԳԲՏ անձանց, վիրավորական արտահայտություններից զատ, նաև բռնության կոչեր հնչեցրել, իսկ գայթակղվող տղամարդկանց արդարեցրել, որովհետև, ըստ նրա, կանայք կարճ են հագնվում:
«Մենք երեկ լսեցինք շատ տխրեցնող, շատ մտահոգիչ արտահայտություններ օրինակ՝ Վարդան Ղուկասյանի կողմից՝ թիրախավորելով կոնկրետ համայնքի ներկայացուցիչների՝ կանանց, սեռական փոքրամասնություններին և այլ խմբերի: Սա այս խմբերի դիրքը հասարակության մեջ նսեմացնելու, արժանապատվությունը վիրավորելու և հավասարության իրավունքը ժխտելու փորձ է, ինչը բացարձակ անընդունելի է», - ասաց «Ականատես» դիտորդական առաքելության ներկայացուցիչը:
Նա հավելեց՝ ընտրություններին մասնակից քաղաքական ուժերի հետ ասոցացվող կամ նրանց հետ փոխկապակցված թե՛ իշխանական, թե՛ ընդդիմադիր լրատվամիջոցները նպաստել են ատելության խոսքի տարածմանը:
Դիտորդը հիշեցրեց քարոզարշավի վերջին օրը իշխանական Civic.am-ի հրապարակած տեսանյութը, որտեղ, ըստ լրատվամիջոցի՝ Վարդան Ղուկասյանի անչափահաս ազգականը մի խումբ տղաների հետ մերկացնում է անչափահաս աղջկան: Հովեյանը պնդեց՝ եթե այդ տեսանյութն իրավապահներից է հասել լրատվամիջոցին, դա վարչական ռեսուրսի չարաշահում է ու պետք է իրավական ընթացք ստանա: Իսկ եթե իսկապես ադրբեջանական Տելեգրամ ալիքներում է նախ տարածվել, հետո հայտնվել իշխանական լրատվամիջոցում, ապա հաշվի չի առնվում արդեն իսկ շատ խոցելի իրավիճակում գտնվող տուժողի, զոհի կարգավիճակը, շեշտեց դիտորդը:
«Դեպքը հերթական անգամ շահարկվում է քաղաքական դիվիդենտների պատճառով, բայց չէ՞ որ այս ամենի հետևում իրական մարդիկ են իրական զգացումներով, ճակատագրերով», - հավելեց նա:
Դիտորդներն ակնկալում են, որ համապատասխան պետական կառույցները կարձագանքեն բռնության, ատելության բոլոր կոչերին:
