Իսրայելի պաշտպանության բանակը՝ վկայակոչելով իսրայելական հետախուզությունը, հայտարարել է ԱՄՆ-ի և ԵՄ կողմից ահաբեկչական կազմակերպություն ճանաչված «Համաս»-ի կողմից անցած տարվա հոկտեմբերի 7-ին պատանդառված ևս չորս անձանց մահվան մասին։
Նշվում է, որ պատանդների մարմինները դեռ Գազայում են։
79-ամյա Չայմ Փերին, 80-ամյա Յորամ Մեցգերը, 84-ամյա Ամիրամ Կուպերը և 51-ամյա Նադավ Փոփլվելը առևանգվել են Նիր Օզ և Նիրիմ ավաններից։
Ըստ հետախույզների՝ նրանք մահացել են մի քանի ամիս առաջ։ Նրանց մահվան հանգամանքները չեն բացահայտվում։
«Համաս»-ի զինյալներն այս չորս պատանդներին պահել են Գազայի հատվածի հարավում՝ Խան Յունիս քաղաքի մոտ: Նրանցից երկուսի կանայք՝ Նուրիտ Կուպերն ու Թամի Մեցգերն առևանգվել են իրենց ամուսինների հետ, սակայն փոխանակման արդյունքում ազատ են արձակվել նոյեմբերի 28-ին։
Դեկտեմբերին «Համաս»-ը հրապարակել էր Փերիի, Կուպերի և Մեցգերի հետ կապված քարոզչական մի տեսանյութ, իսկ մարտին հայտարարել, թե նրանք սպանվել են Գազայի հատվածում՝ իսրայելական հրետանու գնդակոծությունից։
Իրավիճակը Մերձավոր Արևելքում կտրուկ սրվել է 2023 թվականի հոկտեմբերի 7-ին, երբ «Համաս»-ի զինյալները Գազայի հատվածից անսպասելիորեն հարձակվել են հրեական խաղաղ ավանների վրա: Այդ գրոհների հետևանքով սպանվել է մոտ 1200 իսրայելցի, ևս ավելի քան 250 իսրայելցի պատանդառվել է:
Նոյեմբերին Իսրայելն ու «Համաս»-ը գերիներ են փոխանակել։ Սակայն «Համաս»-ի կողմից դեռ 120 մարդ պատանդ է պահվում, այդ թվում՝ կանայք, ծերեր և երեխաներ։
Ըստ պաղեստինյան անկլավի առողջապահության նախարարության՝ Գազայի հատվածում իսրայելան ռազմական գործողությունների հետևանքով զոհված պաղեստինցիների թիվը գերազանցել է 36 հազարը։
Իսրայելի կառավարությունը հայտարարել է, որ Գազայի հատվածն ամբողջությամբ մաքրելու է «Համաս»-ի ահաբեկիչներից: Մեծ թվով երկրներ անհամաչափ են համարում Իսրայելի պատասխան գործողությունները:
