Ո՞վ բերեց Նիկոլ Փաշինյանին իշխանության. նախկին նախագահներ Ռոբերտ Քոչարյանի ու Սերժ Սարգսյանի թիմերի հրապարակային այս վեճին օրեր անց խառնվեց վարչապետ Փաշինյանը: Այսօր առավոտյան Ֆեյսբուքով պատասխանեց քաղաքական հակառակորդներին՝ մեկ ժամվա մեջ երեք գրառմամբ:
«Երկու կիսամաշ դեմքեր իրենց շրջապատներով վիճում են, թե ո՞վ է ինձ իշխանության բերել, միմյանցից պահանջելով ասել ճշմարտությունը: Դուք ասեք ձե՞զ ով է ժամանակին իշխանության բերել՝ Հայաստանի Հանրապետության ժողովրդի ձայնը երբեք չստացած այ ընտրակեղծարար-ուզուրպատորներ»:
Այս գրառումից կես ժամ հետո Փաշինյանը երկրորդ ստատուսը գրեց ու նախկինների հարցին ավելի հասցեական պատասխանեց. - «Ինձ իշխանության ոչ ոք չի բերել: 2018թ. Ժողովրդական, ոչ բռնի, թավշյա հեղափոխությունը իշխանության է բերել Ժողովրդին: Ես ընդամենը ժողովրդի իշխանության տեղապահն եմ և Ժողովուրդն ինձ ուրիշով կփոխարինի՝ երբ ցանկանա»:
Երկու պատասխանը գործադիրի ղեկավարը բավարար չհամարեց՝ կես ժամ հետո երրորդը հրապարակեց՝ արդեն անդրադառնալով Ռոբերտ Քոչարյանին ու Սերժ Սարգսյանին իշխանություն բերողների նպատակներին:
Գործադիրի ղեկավարը քաղաքական հակառակորդներին պատասխանում էր աշխատանքային ժամերին, արձագանքում օգտատերերի մեկնաբանություններին՝ դարձյալ թիրախավորելով նախկիններին:
«Ընտրակեղծարար-ուզուրպատորնե՛ր, չմոռանաք ասել, թե ձեզ իշխանության բերողներն ինչի՞ համար են ձեզ իշխանության բերել Հայաստանի Հանրապետությունում: Դուք դա չեք ասի, ես ասեմ. որ Հայաստանի Հանրապետությունը երբեք անկախ պետություն չլինի, որ պետություն չլինի ընդհանրապես», - նշել է վարչապետը:
Էդուարդ Շարմազանովն ու Լևոն Քոչարյանը հակադարձում են
Հանրապետական Էդուարդ Շարմազանովն արձագանքեց. - «Եթե ինքը ակնարկում է, որ անկախ չենք եղել, Ռուսաստանի տիրապետության տակ ենք եղել, հիշեցնեմ, օրը քանի անգամ էր Նիկոլ Փաշինյանը ասում спасибо Վլադիմիր Պուտինին, ի՞նքն է խոսում անկախությունից, հիմա էլ թռել է Թուրքիայի գիրկը, վաղը հեսա Թրամփն ու Պուտինը կարող է ինչ-որ մի բան պայմանավորվեն, էլի գնա Վլադիմիր Վլադիմիրվիչն ասի՝ այ ցավդ տանեմ, Պուշկինի ցավը տանեմ, Գրիբայեդովի ցավը տանեմ, Ստալինի ցավն էլ տանեմ, ողորմած պապիդ ցավն էլ տանեմ»:
Հայաստանի անկախությունն ու լինել- չլինելու վտանգը հայ ժողովրդի գլխին կախվեց հենց Նիկոլ Փաշինյանի օրոք, վարչապետին հակադարձում է Հանրապետական Էդուարդ Շարմազանովը՝ հիշեցնելով Ադրբեջանի ղեկավարի պահանջները:
«Նիկոլ Փաշինյանը միակ ղեկավարն է, ում իշխանության օրոք Ալիևը պահանջում է Հայաստանի Հանրապետության իշխանություններից փոխել Սահմանադրությունը, այդ թվում՝ Անկախության հռչակագիրը: Նիկոլ Փաշինյանն Անկախության հռչակագրի հերն անիծում է, ինքը կռիվ է տալիս Հայաստանի Հանրապետության գաղափարական հիմքերի հետ: Գաղափարական հիմքերը Սահմանադրությունն է և Անկախության հռչակագիրը: Ո՞վ է խոսում անկախությունից, Նիկոլը, որ ՄԱԿ անդամ Հայաստանի Հանրապետությանը կանգնել հայտարարել է, որ Հայաստանը կադաստրի վկայական չունի: Դա ասում է՝ մեկ Իլհամ Ալիևը, մեկ Նիկոլ Փաշինյանը», - ասաց Շարմազանովը:
Հայաստանի անկախության ու գոյության հարցերը մինչև Նիկոլ Փաշինյանի իշխանության գալը ե՞րբ է քննարկվել, Փաշինյանին հարցնում է նախկիններից Ռոբերտ Քոչարյանի որդին՝ ընդդիմադիր պատգամավոր Լևոն Քոչարյանը:
«Դրա համար շատ բան պետք չէ, պարզապես պետք է նայել անցած 91 թվից սկսած մեր պատմությունը: Ե՞րբ է Հայաստանը հայտնվել վտանգի տակ, ե՞րբ է ունեցել կորուստներ ու էսքան զոհել, 18 թվականից հետո է եղել հենց իր իշխանության ժամանակ: Այսինքն, ինչի՞ մասին է այստեղ խոսք գնում», - նշեց Լևոն Քոչարյանը:
Ընտրակեղծարարներ ու ուզուրպատորներ մեղադրանքին անդրադարձավ Էդուարդ Շարմազանովը հիշեցրեց 2017-ի խորհրդարանական ընտրությունները: Ի՞նչ էր անում ընդդիմադիր Նիկոլ Փաշինյանը, եթե կեղծվել էին ընտրություններն ու ուզուրպացրել էին իշխանությունը: Ընդդիմադիր «Ելք» դաշինքը, որի եռյակում էր Փաշինյանն ու հետո դարձավ խորհրդարանական խմբակցության ղեկավարը, ինչո՞ւ փողոցում չէր կամ Սահմանադրական դատարանում:
Փաշինյանի կառավարության դեմ պայքարող ու միմյանց դեմ առճակատող ընդդիմադիր թևերի անդամները վերահաստատում են՝ անկախ այս հակամարտությունից իրենց օրակարգում գլխավորը ոչ թե Փաշինյանին բերողի, այլ նրան իշխանությունից հեռացնելու հարցն է:
Նախկինների միջև այս հրապարակային վեճը սկսվեց անցած շաբաթվանից: Երկրորդ նախագահի թևն ակնարկում է, որ Սերժ Սարգսյանը կարող էր կանխել հեղափոխությունը, բայց չի արել: Ուղիղ չեն ասում, որ Սերժ Սարգսյանն է բերողը: Երրորդ նախագահի թևից էլ ենթադրում են, որ այդ մեղադրանքի թեզը երկրորդ գրասենյակից է շահարկվում առաջիկա խորհրդարանական ընտրություններում ավելի շատ ձայներ ստանալու ակնկալիքով:
Ռոբերտ Քոչարյանի թիմակիցներից պատգամավոր Աղվան Վարդանյանը խորհրդարանական հարթակից կողմերին հորդորեց զատվել ու առաջիկա ընտրություններին առանձին պայքարել գլխավորի՝ Նիկոլ Փաշինյանի դեմ:
