2024 թվականին Հայաստանում գրանցվել է 4 հազար 314 ճանապարհատրանսպորտային պատահար, որի հետևանքով 333 մարդ մահացել է, 6 հազար116-ը՝ վիրավորվել, Ազգային ժողովում, ճանապարհային երթևեկության անվտանգության թեմայով լսումների ժամանակ, հայտարարեց իշխող «Քաղաքացիական պայմանագիր» խմբակցության պատգամավոր Արմեն Խաչատրյանը։
Նրա փոխանցմամբ, միայն 2025-ի հունվար, փետրվար, մարտ ամիսներին արձանագրվել է 988 ճանապարհատրանսպորտային պատահար՝ 60 զոհ, 1391 վիրավոր:
«10 տարվա ընթացքում, խաղաղ պայմաններում 3 մլն բնակչություն ունեցող երկրում ունենում ենք 3 հազար 600-ից ավելի զոհ, մոտ 70 հազար վիրավոր, որոնցից 2-3 հազարը ձեռք են բերում ցմահ հաշմանդամություն», - ընդգծեց պատգամավորը։
Ավելի վաղ հաղորդվել է, որ 2023 թվականին Հայաստանում ճանապարհատրանսպորտային պատահարներից զոհվել է 379 մարդ։
