ԱՄՆ պետքարտուղար Էնթոնի Բլինքենը Ադրբեջանի նախագահ Իլհամ Ալիևի հետ հեռախոսազրույցում ընդգծել է Հայաստանի և Ադրբեջանի միջև կայուն և արժանապատիվ խաղաղության հասնելու կարևորությունը։
Պետքարտուղար Բլինքենը, ըստ ամերիկյան կողմի հաղորդագրության, ողջունել է կողմերի միջև վերջին առաջընթացը, ներառյալ՝ սահմանազատման հանձնաժողովների համատեղ գործունեության կանոնակարգի ստորագրումը։ Իլհամ Ալիևն, իր հերթին է դրական որակել դա՝ հավելելով, որ սահմանազատման գործընթացն իրականացվելու է կանոնակարգի հիման վրա։
Ադրբեջանական կողմի հաղորդագրության համաձայն՝ պետքարտուղարն ասել է, որ Միացյալ Նահանգները կշարունակի ջանքերը խաղաղության հասնելու համար:
Իլհամ Ալիևը հայտարարել է, թե տարածաշրջանում արդեն կա խաղաղություն, պնդել, թե «հենց Բաքվի ջանքերի շնորհիվ են տարածաշրջանում ի հայտ եկել նոր իրողություններ և ստատուս քվո»։
Ադրբեջանի նախագահը Բլինքենի հետ զրույցում կրկնել է, որ խաղաղության պայմանագրի ստորագրելու համար կարևոր է, որ Հայաստանը փոխի Սահմանադրությունը, ինչպես նաև ԵԱՀԿ Մինսկի խմբի և հարակից բոլոր ինստիտուտների գործունեության դադարեցումն է կարևորել։
Սահմանադրության փոփոխությունը Հայաստանն իր ներքին գործն է համարում։
Հայաստանի ԱԳՆ-ը նաև հայտարարել է, որ հայկական կողմը Մինսկի գործընթացի շարունակականության հարցը կարող է դիտարկել առաջին հերթին՝ խաղաղության պայմանագրի կնքման համատեքստում։
Պետքարտուղարը և նախագահ Ալիևը քննարկել են նաև Ադրբեջանի կողմից մարդու իրավունքների պաշտպանության միջազգային պարտավորություններին և պարտականություններին համապատասխանելու կարևորությունը:
Նախորդ շաբաթ ԱՄՆ պետքարտուղարը հեռախոսազրույց էր ունեցել նաև Հայաստանի վարչապետի հետ, վերահաստատել Հայաստանի և Ադրբեջանի միջև տևական և արժանապատիվ խաղաղության կարևորությունը։
