Հայաստանի կողմից Պաղեստինը որպես անկախ պետություն ճանաչելը, ըստ թուրքագետ Ռուբեն Սաֆրաստյանի, աշխարհաքաղաքական առումով, ճիշտ քայլ էր։
«Ազատության» հետ զրույցում Սաֆրաստյանը սա սպասելի քայլ համարեց՝ նշելով, որ այսպիսով Հայաստանը միանում է աշխարհի մոտավորապես 140 երկրներին, որոնք ճանաչել են Պաղեստինը որպես անկախ պետություն, այսինքն՝ կողմնակից են երկու պետությունների գաղափարախոսության վրա այդ բարդ՝ Պաղեստինի և Իրսրայելի խնդիրը լուծելու մոտեցմանը։
«Ես կարծում եմ, որ սա ճիշտ քայլ էր աշխարհաքաղաքական առումով, իսկ որ Թուրքիան դրան նայում է գոհունակությամբ, սա պայմանավորված է Թուրքիայի քաղաքականությամբ․ սա Թուրքիայի մոտեցումն է այս հարցին, որտեղ Էրդողանը և Թուրքիան փորձում է իր հեղինակությունն իսլամական աշխարհում, արաբական աշխարհում բարձրացնել», - ասաց Սաֆրաստյանը՝ շարունակելով․ - «Թուրքիան այստեղ էլ իր խաղն է խաղում․ մի կողմից փորձում է օգտագործելով սուր, հակաիսրայելական հռետորաբանություն իր հեղինակությունը բարձրացնել իսլամական, արաբական աշխարհում, բայց մյուս կողմից փորձում է հնարավորինս օգուտներ ստանալ և պահպանել այն օգուտները, որ ստանում էր Իսրայելի հետ համագործակցությունից։ Եթե Թուրքիայի այս ընդհանուր քաղաքականության շրջանակներում դիտարկենք Հայաստանի քայլը, իսկ դա արվում է այդպես Անկարայից, ապա պարզ է դառնում, որ Անկարայի համար դրական քայլ է Հայաստանի կողմից ճանաչելը Պաղեստինը որպես անկախ պետություն»։
Հունիսի 21-ին Երևանը հայտնեց, որ ճանաչում է Պաղեստինի պետությունը։ Պաղեստինը շնորհակալությամբ, Իսրայելը կոշտ քննադատությամբ արձագանքեց Հայաստանի այս որոշմանը: Թուրքիայի նախագահը ողջունել է Հայաստանի կողմից Պաղեստինի ճանաչումը։
Սաֆրաստյանի հետ հարցազրույցն ամբողջությամբ կարող եք դիտել ստորև․
