ԱՄՆ-ի և Եվրամիության կողմից ահաբեկչական ճանաչված «Համաս» խմբավորումը պատրաստվում է հինգշաբթի Իսրայելին հանձնել 2023-ի հոկտեմբերի 7-ին Իսրայելի հարավում հարձակման ժամանակ պատանդ վերցված անձանց մի քանի մարմիններ։ Իսրայելական լրատվամիջոցները նշում են, որ խոսքը չորս-հինգ դիակի մասին է։
Զոհերի անունները դեռ չեն հրապարակվում։ Ակնկալվում է, որ ծայրահեղական «Համաս»-ն իսրայելական կողմին ցուցակը կփոխանցի փետրվարի 20-ի առավոտյան, ապա նույնականացման ընթացակարգ կիրականացվի, այդ նպատակով դիակները կտեղափոխվեն Թել Ավիվի դատաբժշկական ինստիտուտ։ Մարմինների ինքնությունը հաստատելուց հետո միայն տեղեկատվությունը կփոխանցվի մահացածների ընտանիքներին։
Միևնույն ժամանակ «Համաս»-ը չի հրաժարվել ողջ մնացած իսրայելցի պատանդների ևս մեկ խումբ ազատ արձակել։ The Times of Israel-ը հայտնում է, որ ևս երեք գերի կարող է ազատ արձակվել շաբաթ օրը։
Իսրայելն ու «Համաս»-ը Գազայի հատվածում հրադադարի և պահվող անձանց փոխանակման շուրջ պայմանավորվածությունը ձեռք են բերել հունվարի 15-ին։ Գործարքի համաձայն՝ առաջին փուլում, որը 42 օր է սահմանվել, Իսրայելի դուրս կբերի իր զորքը Գազայից, ինչի դիմաց պաղեստինյան խմբավորումն ազատ կարձակի 33 իսրայելցի պատանդներին։ Պատանդառվածներից 8-ը ենթադրաբար մահացած են։ Այս պահի դրությամբ 19 պատանդ է ազատ արձակվել։
