Սիրիայում իսլամիստական զինված խմբավորումները գիշերը մտել են կառավարական ուժերի վերահսկողության տակ գտնվող Հալեպ քաղաք և գրավել դրա մեծ մասը։ Ըստ Reuters-ի՝ Հալեպի օդանավակայանը և քաղաք տանող բոլոր ճանապարհները փակ են։
Մարդու իրավունքների սիրիական դիտորդական խումբը տեղեկացրել է, որ իսլամական Հայաթ Թահրիր ալ-Շամ ռազմաքաղաքական կազմակերպության ղեկավարությամբ գործող զինյաները գրեթե դիմադրության չեն հանդիպել քաղաք մտնելիս։
Միացյալ Նահանգները Հայաթ Թահրիր ալ-Շամն ահաբեկչական կազմակերպություն է ճանաչել։
Սիրիական բանակը հաստատել է, որ ապստամբների հարձակման ժամանակ բանակի տասնյակ զինվորներ են սպանվել։ Բանակի տարածած հայտարարությունում նաև ասվում է, որ կառավարական ուժերը ստիպված են եղել վերադասավորվել, որպեսզի ապահովեն խաղաղ բնակիչների և զինվորների անվտանգությունը և պատրաստվեն հակահարձակման։
Սիրիական բանակի երկու աղբյուր Reuters-ին հայտնել է, որ շաբաթ ռուսական և սիրիական ռազմական ինքնաթիռները Հալեպի արվարձաններից մեկում հարվածներ են հասցրել ապստամբների դիրքերին: Ռուսաստանը հաստատել է տեղեկությունը։ Ավիահարվածների հետևանքով Իդլիբում բենզալցակայան է վնասվել, կան տուժածներ։
Մեկնաբանելով իրավիճակը՝ Կրեմլի խոսնակ Դմիտրի Պեսկովը հայտարարել է, որ Մոսկվան ապստամբների հարձակումը համարում է Սիրիայի ինքնիշխանության ոտնահարում. - «Մենք կողմնակից ենք, որ սիրիական իշխանությունները կարգուկանոն հաստատեն այդ տարածքում և հնարավորինս արագ վերականգնեն սահմանադրական կարգը»։
Թուրքիայի արտգործնախարար Հաքան Ֆիդանը հերքել է Թուրքիայի ներգրավվածությունը ապստամբների գործողություններին՝ պնդելով, որ Անկարան երբեք թույլ չի տա, որ Սիրիայում «ահաբեկչական կառույցը վերածվի պետության»։
Ֆիդանը Միացյալ Նահանգներին է մեղադրել տարածաշրջանում նման խմբավորումներին աջակցելու համար՝ պնդելով, որ նրանք երեք օր անգամ չեն կարող շարունակել իրենց գործողություններն առանց Վաշինգտոնի աջակցության։ Հայտնի փաստ է, սակայն, որ Անկարան, ի տարբերություն Թեհրանի և Մոսկվայի, աջակցում է ոչ թե Ասադի ռեժիմին, այլ դրան ընդդիմացող խմբավորումներին, որոնց օգնությամբ անցած տարիներին ռազմական ներկայություն է հաստատել Սիրիայի հյուսիս-արևմուտքում։
Ի՞նչ իրավիճակ է Հալեպում. հայ համայնքի ներկայացուցիչն է հաղորդում
Տեղի բնակիչներից մեկը, հավանաբար անվտանգության նկատառումներից ելնելով, չցանկացավ ներկայանալ, բայց «Ազատության» հետ զրույցում Հալեպի հայ համայնքից որոշ մանրամասներ հայտնեց:
Ջիհադիստները հարձակումն սկսել էին շաբաթվա սկզբին՝ գրավելով կառավարության կողմից վերահսկվող քաղաքները Հալեպի և Իդլիբի շրջաններում և հասել Հալեպ, որտեղից նրանց մոտ մեկ տասնամյակ առաջ կառավարական ուժերը դուրս էին հանել:
Մարդու իրավունքների սիրիական դիտորդական խմբի տվյալներով՝ շաբաթվա սկզբին ապստամբների նախաձեռնած հանկարծակի հարձակումից ի վեր ավելի քան 300 մարդ, այդ թվում՝ 20 խաղաղ բնակիչ է սպանվել։
