Չնայած Ադրբեջանի նախագահը Սահմանադրությունից Հայաստանի Անկախության հռչակագիրը հանելն ու ԵԱՀԿ Մինսկի խումբը լուծարելը խաղաղության պայմանագրի ստորագրման նախապայման է որակում, Նիկոլ Փաշինյանի կաբինետի անդամ, արդարադատության նախարար Սրբուհի Գալյանն ասում է՝ Կառավարությունն Ալիևի հնչեցրած մտքերը որպես նախապայմաններ չի դիտարկում:
«Ազատություն»-ը հարցրել էր նախարարին՝ իշխանությունը պատրաստվո՞ւմ է կատարել Ադրբեջանից հնչող նախապայմանները: Գալյանը մի քանի անգամ անպատասխան թողեց հարցը՝ միայն պայմանագրի կնքման պատրաստակամության մասին բարձրաձայնելով. - «Հայաստանը միարժեքորեն պատրաստ է կնքել խաղաղության պայմանագիրը, ընդ որում՝ նախապայմաններ որպես ես այդ հնչեցված մտքերը չեմ դիտարկում և կարծում եմ, որ Կառավարությունն էլ չի դիտարկում: Ես իմ խոսքում նշել եմ, որ խաղաղությունը այլընտրանք չունի, և մեր գործողությունները, այո, պետք է միտված լինեն խաղաղության վերջնական հաստատմանը: Բայց թե ինչ կոնցեպտով պետք է առաջ շարժվենք դեպի խաղաղության պայմանագրի կնքումը, կարծում եմ, որ շատ շուտով հանրությանը հայտնի կլինի»:
Թե ի՞նչ նկատի ուներ նախարարը նոր կոնցեպտի մասին խոսելով, անհայտ մնաց:
Փաստն այն է, որ 20 օր է՝ Հայաստանը գրեթե ամենօրյա ռեժիմով կրկնում է խաղաղության պայմանագրի համաձայնեցված նախագիծը ստորագրելու պատրաստակամությունը, Բաքուն ի պատասխան երկու պահանջներն է հիշեցնում, շեշտում՝ այդ նախապայամանները հայտնի են Հայաստանին, իրենք դրանք երկար ժամանակ է առաջ են քաշել:
Հենց Սրբուհի Գալյանի ղեկավարած գերատեսչությունն է զբաղվում նոր Սահմանադրության նախագծի մշակմամբ:
Ըստ Երևանի՝ Մինսկի խմբի լուծարումը հնարավոր է համաձայնագրի ստորագրումից հետո, իսկ Սահմանադրության փոփոխությունը Հայաստանի ներքին գործն է։
Չնայած այս հայտարարություններին՝ վարչապետ Փաշինյանը ապագա Սահմանադրությունը որակել էր տարածաշրջանային նշանակության, իսկ արդարադատության նախարարն ասել էր, թե այն չպետք է վտանգի խաղաղության պայմանագիրը։
Ադրբեջանի պահանջների ֆոնին Հայաստանը հնարավո՞ր է ավելի կարճ ժամկետներում գնա սահմանադրական հանրաքվեի:
«Եթե խոսքը նոր Սահմանադրության մասին է, ապա դա պարզ առաջադրանք չէ, որը կարելի է կատարել մեկ, երկու կամ երեք ամիսների ընթացքում, և դա մասնագետների տևական աշխատանք է պահանջում, և ես ժամկետներ նախորդիվ էլ եմ նշել՝ խոսքը 8-ից 10 ամսվա մասին է, և չեմ կարծում, որ նոր Սահմանադրության տեքստ հնարավոր է այդ ժամկետից ավելի շուտ ունենալ», - ասաց Գալյանը:
Նախարարն այսօր պնդում էր՝ դեռ չեն հասել Անկախության հռչակագիրը հանել-պահպանելու հարցի քննարկմանը: Բաքուն պնդում է՝ Սահմանադրության մեջ Անկախության հռչակագրին հղումը տարածքային պահանջ է պարունակում Ադրբեջանի նկատմամբ: Հայաստանի Սահմանադրական դատարանը որոշել է, որ Մայր օրենքի տեքստում այն իրավական նշանակություն չունի:
«Իմ անձնական տեսակետը համապատասխանում է Սահմանադրական դատարանի տեսակետին», - ասաց Սրբուհի Գալյանը:
Երեւանում այսօր վարչապետի ու Անվտանգության խորհրդի քարտուղարի հետ հանդիպումներ է անցկացրել Հարավային Կովկասում Եվրամիույան հատուկ ներկայացուցիչ Մագդալենա Գրոնոն: Նրա քննարկումների առանցքում Հայաստան-Ադրբեջան խաղաղության գործընթացն էր:
Գրոնոն կարևորել է համաձայնագրի ստորագրումը, տեղեկացրեց վարչապետի գրասենյակը:
«Հայաստանը պատրաստ է շուտափույթ կնքել խաղաղության համաձայնագիրը, որը տարածաշրջանը կուղղորդի դեպի հարատև խաղաղություն և կայունություն», - Գրոնոյի հետ հանդիպմանը Հայաստանի տեսակետը վերահաստատել է Արմեն Գրիգորյանը:
Անվտանգության խորհրդի քարտուղարի գրասենյակը չի փոխանցել՝ արդյոք Բաքվի առաջ քաշած նախապայմանները քննարկվել են:
Ու մինչ կողմերը հրապարակային հայտարարություններ են փոխանակում, խաղաղության պայմանագրի կնքման ժամկետների հարցում անորոշությունը է՛լ ավելի է խորանում:
Համաձայնագրի ստորագրմանը հասնելու հարցում Հայաստանին ու Ադրբեջանին այսօր իր օգնությունն է առաջարկել Թեհրանը:
Լրագրողների հետ զրույցում Հայաստանում Իրանի դեսպանը, ըստ «Արմենպրես»-ի, ասել է՝ տարածաշրջանը չի դիմանա որևէ լարվածության։ Հույս ունեն, որ բոլոր կողմերը կպահպանեն այդ սկզբունքները՝ միտված խաղաղությանը և հանգստությանը:
