Հայաստանի ռազմական գերատեսչությունը հերքում է ադրբեջանական դիրքերի ուղղության կրակ բացելու պնդումը։
Բաքուն մասնավորապես պնդել է, թե ապրիլի 28-ին, ժամը 00:25-ին, Հայաստանի ԶՈւ ստորաբաժանումները Ճամբարակի շրջանի ուղղությամբ տեղակայված դիրքերից փոքր տրամաչափի զենքերից կրակել են ադրբեջանական բանակի դիրքերի վրա։ Հայաստանի պաշտպանության նախարարությունն ընդգծում է՝ Ադրբեջանի ՊՆ հաղորդագրությունը չի համապատասխանում իրականությանը
ՊՆ-ը կրկին հիշեցրել է Երևանի առաջարկը՝ ստեղծել հրադադարի ռեժիմի խախտման դեպքերի և/կամ այդ մասին տեղեկությունների հետաքննության Հայաստան-Ադրբեջան համատեղ մեխանիզմ։ Բաքուն այս առաջարկը մինչ օրս անպատասխան է թողել։
Հայաստանի պաշտպանության նախարարությունը վերահաստատում է, որ պատրաստ է հետաքննել Ադրբեջանի ՊՆ հաղորդագրությունը հիմնավորող փաստերը՝ դրանք ՀՀ-ին փոխանցելու պարագայում։
Վերջին շաբաթներին Բաքուն Երևանին գրեթե ամենօրյա ռեժիմով մեղադրում է իր դիրքերը թիրախավորելու համար, այս նույն ընթացքում Սյունիքի, Գեղարքունիքի սահմանային բնակավայրերից հաղորդում են ադրբեջանական կողմից չդադարող կրակոցների մասին։ Մարտի 31-ից հայկական կողմը հաղորդել է Սյունիքի Խնածախ և Խոզնավար գյուղերի ուղղությամբ ադրբեջանցիների կրակոցների մասին՝ Բաքվին կոչ անելով հետաքննել այդ փաստերը և հանդես գալ հրապարակային պարզաբանումներով։
