Անցած ուրբաթ կալանավորված երեք անչափահասների մայր Լիանա Հարությունյանի կալանքը փոխվեց վարչական հսկողության ու բացակայության արգելքի խափանման միջոցներով:
Մեղադրող դատախազը չառարկեց Լիանա Հարությունյանի խափանման միջոցի փոփոխությանը՝ հայտարարելով, թե հաշվի են առնում երեխայի լավագույն շահը:
Դատավոր Արշակ Մաթևոսյանը հայտարարեց, թե որոշումը կայացվել է՝ հաշվի առնելով, որ Հարությունյանն իր խնամքին երեք անչափահաս երեխա ունի: Ըստ դատավորի՝ որոշման վրա էական ազդեցություն է ունեցել նաև այսօրվա դատական նիստի ժամանակ մեղադրյալի պատշաճ վարքագիծը:
Դատավորը նաև որոշեց վարույթից հեռացնել Լիանա Հարությունյանի փաստաբան Զարուհի Փոստանջյանին՝ հարգելի չհամարելով նիստից նրա բացակայությունը: Մաթևոսյանը բացատրեց, թե պաշտպանը նախորդ նիստին արդեն իսկ ծանուցվել էր նիստի մասին: Փոստանջյանի նկատմամբ ավելի վաղ դատարանն արդեն 5 սանկցիա էր կիրառել:
Երեք անչափահաս երեխաների, այդ թվում՝ 8 ամսական փոքրիկի մայրը մեղադրվում է Հնդկաստանի 16 քաղաքացիների անօրինական միգրացիան կազմակերպելուն օժանդակելու համար։ Նա կալանավորվել էր անցած ուրբաթ՝ մանկահասակ երեխայի հետ միասին։ Կնոջ կալանքը քննադատության մեծ ալիք էր բարձրացրել:
