Թուրքիայի նախագահ Ռեջեփ Թայիփ Էրդողանը մեկնել է ԱՄՆ՝ Վաշինգտոնում հուլիսի 9-ին մասնակցելու ՆԱՏՕ-ի գագաթնաժողովին, հաղորդում է CNN Turk-ը։
Նշվում է, որ Էրդողանը վաղը մասնակցելու է 32 անդամ ունեցող դաշինքի երկրների և կառավարությունների ղեկավարների նիստին, նույն օրը Սպիտակ տանը նրանց հետ ներկա է լինելու ԱՄՆ նախագահ Ջո Բայդենի կողմից կազմակերպված ընթրիքին։
Հինգշաբթի օրը տեղի կունենա ՆԱՏՕ-Ուկրաինա խորհրդի նիստը։
CNN Turk-ը նշում է, որ գագաթնաժողովի շրջանակներում Էրդողանը բազմաթիվ երկկողմ հանդիպումներ կունենա, կներկայացնի նաև «Գազայում Իսրայելի ջարդերը կասեցնելու քայլերը»։
ՆԱՏՕ-ի գագաթնաժողովին մասնակցելու համար Վաշինգտոն են մեկնել նաև Հայաստանի և Ադրբեջանի արտգործնախարարները։
