Թուրքիայի նախագահ Ռեջեփ Թայիփ Էրդողանը փետրվարի 24-ին Անկարայում ընդունել է Ռուսաստանի արտգործնախարար Սերգեյ Լավրովին։
Թուրքական կողմը նշում է, որ հանդիպմանը ներկա է եղել նաև Թուրքիայի արտգործնախարար Հաքան Ֆիդանը՝ այլ մանրամասներ չներկայացնելով։
Ըստ ռուսական կողմի՝ քննարկվել են երկկողմ համագործակցության, միջազգային օրակարգի ընթացիկ հարցեր։
Ռուսաստանի արտաքին քաղաքական գերատեսչության փոխանցմամբ, առանձնահատուկ ուշադրություն է դարձվել սիրիական կարգավորման խնդրին, Պաղեստինի և Իսրայելի հակամարտության գոտում իրավիճակին, կողմերը պայմանավորվել են շարունակել երկխոսությունն, այդ թվում՝ ուկրաինական ճգնաժամի և միջազգային հարաբերություններում փոխադարձ հետաքրքրություն ներկայացնող այլ թեմաների շուրջ։
Լավրովը փետրվարի 23-ի ուշ երեկոյան է ժամանել Անկարա։ Նա հանդիպել է Հաքան Ֆիդանի հետ, քննարկել նաև իրավիճակը Հարավային Կովկասում։ Թուրքիայի արտգործնախարարը ռուսաստանցի իր գործընկերոջ հետ համատեղ ասուլիսում հայտարարել է, որ Անկարան պատրաստ է բանակություններ կազմակերպել Ուկրաինայի հարցով և նպաստել հարցի կարգավորմանը։
