Սաուդյան Արաբիայի մայրաքաղաք Էր-Ռիյադում գտնվող The Ritz-Carlton հյուրանոցում այսօր առավոտից ընթանում է ԱՄՆ և Ռուսաստանի պատվիրակությունների միջև բանակցություններն՝ Ուկրաինայի հարցով։
Դռնփակ հանդիպման ընթացքում կողմերը քննարկում են սևծովյան նախաձեռնության հնարավոր վերսկսումը, որը վերաբերում է Սև ծովում նավագնացության անվտանգությանը, հայտնել է Ռուսաստանի նախագահի օգնական Յուրի Ուշակովը։
Կրեմլի խոսնակ Դմիտրի Պեսկովը հայտարարել է, որ հացահատիկի համաձայնագրի թարմացումից բացի, կքննարկվեն պատերազմի ավարտի այլ «նյուանսներ» և «ասպեկտներ»։
Ռուսական պատվիրակությունը Էր-Ռիյադում, ինչպես հայտարարել է Ուշակովը, ներկայացնում են Դաշնային խորհրդի միջազգային գործերի կոմիտեի ղեկավար Գրիգորի Կարասինը և ԱԴԾ տնօրենի խորհրդական Սերգեյ Բեսեդան։
Մարտի 23-ին Սաուդյան Արաբիայում տեղի ունեցավ նաև ԱՄՆ-ի և Ուկրաինայի պատվիրակությունների հանդիպումը, որի ավարտին Ուկրաինայի պաշտպանության նախարար Ռուստեմ Ումերովը հայտարարել է՝ «զրույցը կառուցողական էր և բովանդակալից, քննարկել ենք առանցքային հարցեր, մասնավորապես, էներգետիկայի ոլորտում»։
Բանակցությունների ֆոնին Մոսկվան ու Կիևը հաղորդում են ԱԹՍ հարվածների մասին։
