Եվրասիական տնտեսական միությունը Հայաստանին տնտեսական առումով ձեռնտու կառույց է, և հայկական կողմը որևիցե միտում չունի այն լքելու, այսօր խորհրդարանում նման հայտարարություն արեց Ազգային ժողովի խոսնակը: Ալեն Սիմոնյանը վստահեցրեց, թե հայկական կողմը տնտեսական այդ կառույցում համագործակցությունը շարունակելու ցանկություն ունի:
Մոսկվայից ԵԱՏՄ-Հայաստան համագործակցությանը վերջին շրջանում պարբերաբար են անդրադառնում՝ համարելով, որ Եվրամիությանն անդամակցության գործընթացի մասին օրինագծին Կառավարության դրական եզրակացությունը ԵԱՏՄ-ն լքելու առաջին քայլն է:
«Եվրամիությանն անդամակցության մեկնարկի մասին օրենսդրական նախաձեռնությունը ժողովրդի կամքն է, մենք ԱԺ-ում նախագիծը կքննարկենք և որոշում կկայացնենք: Չեմ կարծում, որ ռուսական կողմը դրա հետ կապված պետք է մտահոգություն ունենա, և չեմ կարծում, որ որևէ կերպ համատեղելը, համագործակցելը կարող է խնդիր առաջացնել: Եթե իրենց համար դա խնդիր է, ես կարծում եմ՝ չկա այդպիսի խնդիր, որ Հայաստանն ու Ռուսաստանը չեն կարող քննարկել և որոշում կայացնել», - մանրամասնեց Ալեն Սիմոնյանը՝ չբացառելով անգամ, որ խորհրդարանում արևմտամետների նախագծին դեմ կքվեարկեն:
«Ամեն ինչ հնարավոր է, չենք քննարկել, առանց քննարկելու ո՞նց ասեմ: Եղել են նախագծեր, որ Կառավարությունը դրական եզրակացության արժանացրած լինի, բայց խորհրդարանը դեմ քվեարկի», - հավելեց ԱԺ նախագահը:
