Իսրայելի վարչապետ Բենյամին Նեթանյահուն երեկ երեկոյան քառօրյա այցով ժամանել է Հունգարիա՝ իր պաշտոնակից Վիկտոր Օրբանի հետ բանակցությունների։
«Բարի գալուստ Բուդապեշտ, Իսրայելի վարչապետ Բենիամին Նեթանյահու», - Ֆեյսբուքում գրել է Հունգարիայի պաշտպանության նախարար Քրիստոֆ Շալայ-Բոբրովնիցկին՝ օդանավակայանից լուսանկարներ հրապարակել։
Միջազգային քրեական դատարանը 2024-ի նոյեմբերի վերջին Նեթանյահուին ձերբակալելու օրդեր էր տվել՝ Գազայում մարդկության դեմ կատարված հանցագործությունների մեղադրանքով։ Այդ օրվանից ի վեր սա Իսրայելի վարչապետի առաջին այցն է Միջազգային քրեական դատարանին միացած երկիր։
Հունգարիան, որպես ՄՔԴ անդամ երկիր, պարտավոր է ձերբակալել Նեթանյահուին, սակայն վարչապետ Վիկտոր Օրբանն անձամբ է երաշխիքներ տվել, որ Իսրայելի վարչապետը Բուդապեշտում չի ձերբակալվի։
Հունգարիայի վարչապետն առաջիններից էր, որ դատապարտեց Իսրայելի վարչապետին ձերբակալելու ՄՔԴ-ի որոշումը։ «Ցինիկ» ու «միանգամայն անընդունելի» որակելով այն՝ Օրբանն ասել էր՝ «իր ընկերոջ ազատությունը երաշխավորված կլինի, երբ նա ցանկանա գալ Հունգարիա»։
CNN-ը նշում է, որ Բուդապեշտը՝ Նեթանյահուի միջազգային ամենամտերիմ ընկերներից մեկի՝ Վիկտոր Օրբանի ծննդավայրը, ապահով ապաստան է Իսրայելի առաջնորդի համար։
«Ազատություն» ռադիոկայանի հունգարական ծառայության դիվանագիտական աղբյուրները փոխանցել են, որ Օրբանի կառավարությունը որոշել է ընդհանրապես խզել հարաբերությունները ՄՔԴ-ի հետ։ Սա պաշտոնապես չի հաստատվել։
