Գյումրիի նախկին քաղաքապետ Սամվել Բալասանյանը հետախուզման մեջ է, կրտսեր որդին՝ Խաչատուրը տնային կալանքի տակ՝ ընտանիքին պատկանող «Սև բերդ» պատմական ամրոցի հարակից հողերն ապօրինի օտարելու մեղադրանքներով:
Փաստաբան Տիգրան Գրիգորյանը պնդում է՝ փողերի լվացման ու պաշտոնական լիազորությունների չարաշահման համար մեղադրվող իր վստահորդը նախաքննությունից չի թաքնվում և չի փախել, բուժվելու համար մեկնել է Միացյալ Նահանգները ու երբ առողջական վիճակը թույլ տա, կվերադառնա:
«Էս գործ կոչվածը մոտ երեք տարի չգիտես ինչ են քննել, և պարոն Բալասանյանը էս ընթացքում մի քանի անագամ տարվա մեջ գնացել է Հայաստանից դուրս, վերադարաձել է, էլի է գնացել: Պարոն Բալասանյանը փախնող անձ չէ։ Քրեական դատավարության օրենսգիրքը հստակ նախատեսում է, կարգ կա, հեռակա վարույթով էլ կարելի է այս ամենը պարզաբանել», - ասաց փաստաբանը։
Իրավապահները չեն հստակեցնում՝ արդյոք 70-ամյա նախկին քաղաքապետին գտնելու համար դիմել են Միացյալ Նահանգներին, համենայն դեպս, հայաստանյան դատարանն արդեն թույլատրել է նրան կալանավորել:
Ըստ մեղադրանքի՝ Բալասանյանն իր պաշտոնավարման տարիներին պետությանը կամ համայնքին պատկանող հատուկ պահպանվող հողատարածքները մաս-մաս արել ու վաճառել է այլոց, ու, ի վերջո, դրանք ավելի ցածր գնով գնել է կրտսեր Բալասանյանը: Եթե դատախազը հաստատի մեղադրանքը, գործը դատարան կուղարկվի:
Հայր և որդի Բալասանյաններից բացի այս գործով ևս երեք մարդ է անցնում՝ Բալասանյանի քրոջ ամուսինը՝ Գյումրիի նախկին փոխքաղաքապետ Ռուբեն Սանոյանը, մեկ այլ նախկին փոխքաղաքապետ Սուրեն Ջանոյանը և ընտանիքի ևս մեկ մերձավոր:
Բալասանյանների փաստաբանը կարծում է՝ հատկապես փողերի լվացման ծանր մեղադրանք առաջադրելով՝ նախաքննական մարմինը ցանկացել է հնչեղություն տալ այս գործին:
«Մեր հարգարաժան դատախազության աշխատանքային ոճը անպայաման պտի ծանրացնեն, որ ծանր լիներ, հնչեղություն լիներ, բայց չկար էդպիս հիմքեր, իմ խորին համոզմամբ, - «Ազատության» հետ զրույցում ասաց Գրիգորյանը:
Փողերի լվացաման համար նախատեսվում է մինչև 10 տարվա ազատազրկում: Փաստաբանն իր վստահորդներին առաջադրված այս մեղադրանքի վերաբերյալ իր դիքորոշումն ունի:
«Առահասարակ նախ բացակայում է և չհիմնավորված է: Մեղադրական եզրակացությունը դատարան ուղարկելը դեռ չի նշանակում, որ նման բան կա: Վարույթ իրականացնող մարմինը դիտել է փողերի լվացում, չի էլ կարա խոսք գնա անգամ ոչ միայն պարոն Բալասանյանի, Խաչատուր Բալասանյանին նման մեղադրանքը,շատ ներողություն, անհեթեթություն է», - նշեց Գրիգորյանը։
Փաստաբանի փոխանցմամբ, Բալասանյանները մեղադրանքը չեն ընդունում:
Գործարար Խաչատուր Բալասանյանը անցած հոկտեմբերին ԱՄՆ մեկնելու ճանապարհին՝ «Զվարթնոց» օդանավակայանում ձերբակալվեց ու 70 միլիոն գրավի դիմաց տնային կալանքի ենթարկվեց: Որոշ ժամանակ անց նա բանտ տեղափոխվեց, ապա 80 միլիոն դրամի դիմաց դարձյալ տնային կալանքի տակ հայտնվեց: Ինչո՞ւ է հաճախ փոխվում Խաչատուր Բալասանյանի խափանման միջոցը:
«Պաշտպանական կողմի կարծիքն է, որ ճնշումներ էին գործադրում, իսկ այդ փոփոխությունը կապված է դատական ակտից՝ վերաննիչ բողոք է պաշտպանական կողմը տարել, Վերաքննիչ դատարանը փոփոխել էր խափանման միջոցը», - պարզաբանեց Տիգրան Գրիգորյանը։
Հենց այս քրեական գործը օրակարգ բերելուց հետո Գյումրիի իշխող «Բալասնայան» դաշինքը ողջ կազմով հրաժարական տվեց՝ այդպես էլ չհստակեցնելով պատճառը:
Նախքան այս իրադարձությունները Գյումրիի ավագանին, ՔՊ-ի նախաձեռնությամբ, նիստ գումարեց ու որոշեց երկու նախկին քաղաքապետերի օրոք օտարված 24 անուն գույքը համայնքին ետ վերադարձնելու պահանջով դիմել դատարան: Կողմ քվեարկեց նույնիսկ «Բալասանյան» դաշինքը: Ավագանու նշած գույքերի ցանկում նաև Բալասանյաններին պատկանող հողատարածքներն են:
