Բաքվի դատարանում ապրիլի 1-ին շարունակվել է Արցախի նախկին պետնախարար Ռուբեն Վարդանյանի դատավարությունը։
Ըստ ադրբեջանական լրատվամիջոցների՝ «դատավարությունը եղել է բաց», ցուցմունք են տվել 20-ից ավելի անձինք, ովքեր, ինչպես ադրբեջանական լրատվամիջոցներն են նշում, «տուժել են հանցավոր խմբի գործողություններից, որին Ռուբեն Վարդանյանը միացել է 2020 թվականի դեկտեմբերին»։
Այնուհետև «հրապարակվել են տուժածների դատաբժշկական փորձաքննության արդյունքները»։
Հաջորդ դատական նիստը նշանակվել է ապրիլի 8-ին։ Արցախի նախկին պետնախարարը շարունակում է ցուցմունք չտալ:
Նախօրդ դատական նիստին մեկ տասնյակից ավելի ադրբեջանցի զինծառայողներ են ցուցմունք տվել՝ պահանջելով Արցախի նախկին պետնախարարի նկատմամբ ամենախիստ պատիժը սահմանել:
Ռուբեն Վարդանյանին Բաքուն մեղադրում է տասնյակ հանցագործությունների, այդ թվում՝ Ադրբեջանի դեմ պատերազմ իրագործելու, ահաբեկչության ֆինանսավորման, անգամ արտերկրում ադրբեջանցի դիվանագետների սպանությունները ծրագրելու մեջ։ Վարդանյանը բարձրաձայնում է իր նկատմամբ ապօրինությունների ու կեղծ դատավարության մասին:
Ռուբեն Վարդանյանից բացի ադրբեջանական բանտերում ևս 22 հայ է պահվում, այդ թվում՝ Ադրբեջանի կողմից Արցախի վրա 2023-ին սեպտեմբերի 19-ի ռազմական հարձակման հետևանքով գերեվարված 15 անձինք։ Գերեվարվածների թվում են Արցախի նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, Ազգային ժողովի նախագահ Դավիթ Իշխանյանը, Պաշտպանության բանակի նախկին հրամանատար Լևոն Մնացականյանը, ՊԲ հրամանատարի նախկին տեղակալ Դավիթ Մանուկյանը և նախկին արտգործնախարար Դավիթ Բաբայանը: Բաքուն Արցախի նախկին պաշտոնյաներին ծանր մեղադրանքներ է առաջադրել՝ ահաբեկչությունից մինչև ապօրինի զինված խմբավորումների կազմավորում։
Եվրախորհրդարանը, մարտի 13-ին, ձայների գերակշիռ մեծամասնությամբ հրատապ կարգով բանաձև ընդունեց Բաքվում պահվող հայերի մասին, կոչ անելով Ադրբեջանին նրանց անհապաղ ու առանց նախապայմանների ազատ արձակել։ Բանաձևը նաև կոչ է անում Բաքվում հավատարմագրված եվրոպացի դեսպաններին, ինչպես նաև Հարավային Կովկասի հարցերով ԵՄ հատուկ հանձնակատարին ներկա լինել և հետևել հայերի դատավարություններին։ Եվրոպական խորհրդարանը պնդել էր՝ հայերի դեմ Բաքվի դատավարությունները շինծու են, նրանք ենթարկվում են նվաստացման ու կտտանքների։
