Ադրբեջանի արտգործնախարար Ջեյհուն Բայրամովը կրկին խոսում է Հայաստանի Սահմանադրության փոփոխության անհրաժեշտության մասին, քննադատում Հայաստանին «միակողմանի աջակցելու» փորձերը։
«Հայաստանի Սահմանադրությունում և իրավական փաստաթղթերում դեռ ադրբեջանական տարածքների նկատմամբ հավակնություններ կան։ Սա պետք է կարգավորվի»,- ասել է Բայրամովը։
Պաշտոնական Երևանը բազմիցս հակադարձել է Բաքվին՝ նշելով, որ ՀՀ Սահմանադրությունը տարածքային պահանջ չի պարունակում հարևան երկրների նկատմամբ։
Ադրբեջանական դիվանագիտության ղեկավարն այսօր նաև «անթույլատրելի քայլ» է որակել, իր ձևակերպմամբ, Հայաստանին միակողմանի աջակցելու փորձերը։ Թե որ երկրներին է ուղղված քննադատությունը, ադրբեջանցի պաշտոնյան չի հստակեցրել։
Բայրամովը միայն նշել է՝ «նման քայլն անընդունելի է այն երկրների կողմից, որոնք իրենց միջնորդ են անվանում հայ-ադրբեջանական հարաբերությունների կարգավորման գործում»։
