Պետական ամենախոշոր հիվանդանոցներից երկուսի տնօրեններն աշխատանքից ազատվել են: Արման Հովակիմյանը «Սուրբ Գրիգոր լուսավորիչ» բժշկական կենտրոնը ղեկավարեց 7, իսկ Նարեկ Մանուկյանը «Ուռուցքաբանության ազգային ինստիտուտը»` 6 տարի:
Առողջապահության նախարար Անահիտ Ավանեսյանը չի բացատրում՝ ինչո՞ւ է նրանց աշխտանքից ազատել. - «Շատ մեծ ներդրում են ունեցել այս երկու խոշոր կենտրոնների ղեկավարությունը և թիմերը՝ ձևավորելու լրիվ նոր մշակույթով, ստանդարտով, ենթակառուցվածքներով, ծառայություններով բժշկական կենտրոններ: Կարծում եմ՝ եկել է ժամանակը՝ արդեն հաջորդ էտապներին անցնելու»:
Բայց, որ այդ հիվանդանոցներից մեկի տնօրենի հաստիքում ցանկանում են տեսնել ԱԺ առողջապահության հանձնաժողովի նախկին ղեկավար Նարեկ Զեյնալյանին, նախարարը հաստատում է: Զեյնալյանն, ի դեպ, այն պատգամավորն է, որն ամիսներ առաջ մանդատը վայր դրեց վարչապետ Փաշինյանից ստացած SMS-ից հետո:
«Այո, պարոն Զեյնալյանի թեկնածությունը քննարկվում է «Սուրբ Գրիգոր Լուսավորիչ» բժշկական կենտրոնում», - ասաց Ավանեսյանը:
Իսկ ո՞վ կփոխարինի, «Ուռուցքաբանության ազգային կենտրոնի» տնօրեն Նարեկ Մանուկյանին: Նախարարն այս հաստիքի համար ցանկալի թեկնածուի անուն չնշեց: Մեր տեղեկություններով՝ շրջանառվում է նախարարի տեղակալ, Արմեն Գասպարյանի անունը, որը Mediahub-ին ասել է, թե նման առաջարկ չի ստացել:
Աշխատանքից ազատված տնօրենների հետ կապ հաստատել չհաջողվեց:
Մինչ նախարարությունը լռում է, մամուլն է հիշեցնում. վարչապետի ենթակայությամբ գործող Պետական վերահսկողական ծառայությունը (ՊՎԾ) նախորդ տարի ավելի քան 15 հիվանդանոց է ստուգել ու նաև այդ երկուսում բացահայտել այսպես ասած «նվիրատվությունների ֆոնդ»: Ըստ ՊՎԾ-ի՝ այն բուժառուները, որոնց բուժման համար ամբողջությամբ կամ մասնակի վճարել է պետությունը, հիվանդանոցների հետ նվիրաբերության պայմանագրեր են կնքել ու լրացուցիչ գումար վճարել: Հիվանդանոցների դրամարկղերում արված այդ մուծումներն անգամ հարկվել են: ՊՎԾ-ն թեև իրավական խախտումներ չի արձանագրել, բայց հերթով զանգել են այդ քաղաքացիներին ու ասել, որ գնան այդ գումարները հետ ստանան:
ՊՎԾ ղեկավար Ռոմանոս Պետրոսյանն «Ազատությանն» ասաց՝ խնդիրը սոցիալ-մշակութային ու բարոյականության դաշտում է, եթե պետությունը փոխհատուցում է պետպատվերով բուժվողների գումարները, ինչո՞ւ պետք է նրանք լրացուցիչ մուծումներ անեն:
«Վարչապետին զեկուցելուց հետո քաղաքական որոշում է կայացվել, որ տվյալ գումարը պետք է ամբողջովին վերադարձնեն այն քաղաքացիներին, ովքեր պետպատվերով ամբողջական փոխհատուցումից զատ նաև նվիրաբերության պայմանագրերի միջոցով լրացուցիչ միջոցներ են վճարել տվյալ կազմակերպություններին», - ասաց Պետրոսյանը:
Խոսքը մոտ 20 հազար բուժառուի ու շուրջ 1 միլիարդ դրամի մասին է: Արդեն 700 բուժառու իրենց գումարները հետ են ստացել:
«Այդ ֆոնդերը գործել են 2018-ի հեղափոխությունից հետո ու գրեթե բոլոր ԲԿ-ներում»,- ասում է Առողջապահության նախարարությունում երկար տարիներ բարձր պաշտոններ զբաղեցրած Ծաղիկ Վարդանյանը: Փորձագետը վստահ է՝ բուժծառայությունների շուկայական գներն ավելի բարձր են, իսկ պետությունը պետպատվերի շրջանակներում, ավելի քիչ է դրա համար վճարում հիվանդանոցներին:
«Օրինակ՝ կույրաղիքի հեռացումը մոտ 189-200 հազարի կարգի մասին է խոսքը փոխհատուցումը, բայց եկեք, տեսեք, որ վճարովի ծառայությունը 350 հազարի մասին է խոսքը: Հենց սա է դրդել, որ ստեղծվել է ինքնուրույն մի մեխանիզմ, այսպես ասած, լրացնելու համար այս գնային տարբերությունը: Իրենք պետք է կարողանան զարգանալ ու շուկայական այս բարդ հարաբերություններում գոյատևեն», - նշեց Վարդանյանը:
Ծաղիկ Վարդանյանը հարցնում է՝ իսկ այդ մուծումներից պետբյուջե մտած հարկերը վերադարձվելո՞ւ են: Վարդանյանը վստահ է՝ Առողջապահության նախարարությունը տեղյակ է եղել, որ կլինիկաներում տարիներ շարունակ գործել են այդ ֆոնդերը:
Հարցնում է՝ ինչո՞ւ նախարարությունը չի հայտարարում, որ այդ գումարներն այսպես, թե այնպես կան, պարզապես հիմա այլևս դրամարկղով չի անցնի, այլ կմնան ստվերում, այսինքն բժշկի գրպանում՝ որպես պացիենտի շնորհակալության դրսևորում:
