Պետական գույքի կառավարման վարչության նախկին պետ, Ազգային ժողովի նախկին նախագահ Գալուստ Սահակյանի որդին՝ Արման Սահակյանը նախ ձերբակալվել, ապա նրա նկատմամբ վարչական հսկողություն է սահմանվել։
Քննչական կոմիտեից «Ազատության»-ը փոխանցեցին, որ Սահակյանի ու 12 այլ անձանց նկատմամբ հանրային քրեական հետապնդում է հարուցվել պաշտոնատար անձանց կողմից իշխանական կամ ծառայողական լիազորությունները չարաշահելու, նույն լիազորություններն օգտագործելով առանձնապես խոշոր չափերով փողերի լվացում կատարելու, պաշտոնատար անձանց օժանդակելու հատկանիշներով, մասնավորապես, 2012-2015թթ. Երևանում գտնվող երեք ուսումնական հաստատությունների տարածքներից առանձնացված հողատարածքները ձևական աճուրդների միջոցով իրենց հետ փոխկապակցված անձանց օտարելու համար։
Ըստ քննչականի՝ Արման Սահակյանն ինչպես նաև ևս 7 անձ ձերբակալվել են և նրանց կալանավորելու միջնորդություններ են ներկայացվել դատարան, որի արդյունքում նրանց նկատմամբ կիրառվել են տարբեր խափանման միջոցներ, Սահակյանի նկատմամբ՝ վարչական հսկողություն: Այլ մանրամասներ քննչականն առայժմ չի հաղորդում։
Սահակյանը դեռ չի արձագանքել հայտարարությանը։
2021-ի փետրվարին Քննչական կոմիտեն հայտնել էր, որ պաշտոնավարման տարիներին պաշտոնեական լիազորությունները չարաշահելով դպրոցներում ու մանկապատեզներում տարածքներ օտարելու համար մեղադրանք է առաջադրվել Երևանի նախկին քաղաքապետ Տարոն Մարգարյանին, այս գործով անցնում է նաև Արման Սահակյանը։ Տարոն Մարգարյանի ու Արման Սահակյանի փաստաբանները նրանց առաջադրված մեղադրանքներն ու քրգործն անհիմն էին համարել։
Իսկ 2021-ի հուլիսին երրորդ նախագահ Սերժ Սարգսյանի եղբոր՝ Լևոն Սարգսյանի դուստրն ու Արման Սահակյանը հրավիրվել էին Գլխավոր դատախազություն ապօրինի ծագում ունեցող գույքի բռնագանձման գործերով։ Թե խոսքը մասնավորապես ինչ գույքի մասին էր, դատախազությունն այն ժամանակ չէր հայտնել։ Սահակյանն այն ժամանակ ասել էր, որ չունի որևէ ապօրինի գույք։
