«Ահազանգ «Նուբարաշեն» քրեակատարողական հիմնարկից՝ 5-րդ հարկում բոլոր ցմահ դատապարտյալների ջարդ է կազմակերպվել», - Ֆեյսբուքում այս գրառումն այսօր կեսօրից հետո իրավապաշտպան Ժաննա Ալեքսանյանն է արել՝ հարց բարձրացնելով՝ ի՞նչ է կատարվում փակ հաստատություններում։ Ավելի ուշ «Ազատության» հետ զրույցում պատմեց՝ «իրեն բանտից էին զանգել դաժան ծեծից հետո»:
«Ընդ որում, զանգահարողը շատ-շատ վատ վիճակի մեջ էր, ձայնը հազիվ էր դուրս գալիս: Հենց նոր էին, որ հեռացել էին հատուկջոկատայինները երևի: Շատ մտահոգիչ ու ծանր վիճակ է, փակ համակարգում անպաշտպան մարդկանց մտնել ու բոլոր ցմահներին այդ վիճակին են հասցրել, որ նրանք գետնին ընկած, արյունլվա, այսպես նկարագրեցին ինձ, և բուժօգնություն էլ չէին ստանում», - ասաց Ժաննա Ալեքսանյանը:
Իրավապաշտպան Անդրեասյանին էլ չի հաջողվել պարզել՝ ինչ էր պատահել, որն էր այս հարձակման պատճառը: Իրենք՝ դատապարտյալները, իրավապաշտպանի պնդմամբ, կարող են միայն ենթադրել։
«Ասում է՝ մենք ոչ մի բանի իրավունք այստեղ չունենք, ինչ-որ մեկը երգել է, թե ինչ է արել: Կցկտուր էր խոսում, տպավորություն էր, որ կարող է լաց լինել: Մենք բռնության մեջ ենք ապրում», - նշեց նա:
Հարցի պատասխանը պետք է քրեակատարողական հիմնարկն ու Մարդու իրավունքների պաշտպանի գրասենյակը տան, պնդեց Ալեքսանյանը՝ ընդգծելով՝ հատուկջոկատայինները գործում են միայն բարձրաստիճան պաշտոնյաների հրահանգով։
Ահազանգից երեք ժամ անց Քրեակատարողական ծառայությունից հաստատեցին՝ ֆիզիկական ուժ կիրառել են: Բացատրեցին՝ դատապարտյալներից մեկն է իրավիճակը սրել, խաթարել հիմնարկի բնականոն աշխատանքը, պարբերաբար ներկայացրել անօրինական պահանջներ և հրահրել մյուսներին իր կերպ վարվել։ Քրեական ենթամշակույթի դեմ պայքարի շրջանակներում որոշել են պառակտում հրահրող դատապարտյալին տեղափոխել այլ բանտ: Հենց այստեղ էլ, ըստ պաշտոնյաների, իրադարձություններն այլ ընթացք են ստացել:
«...որոշ կալանավորված անձինք և ցմահ դատապարտյալներ դրսևորել են անհնազանդություն, վնասել են խցերի գույքը, այրել ներքնակները, հարվածել դռներին և այլն», - ասված է հաղորդագրության մեջ:
Այնուհետև գործի է անցել հատուկ նշանակության բաժինը, և ինչպես բացատրում է քրեակատարողական ծառայությունը, «ֆիզիկական ուժի գործադրմամբ վերջիններս դուրս են բերվել խցերից, իսկ խցերում իրականացվել են խուզարկություններ»։
Ավելի վաղ Մարդու իրավունքների պաշտպանի գրասենյակից էին հայտնել, որ «Նուբարաշենի» բանտ է մեկնել արագ արձագանքման խումբ: Օմբուդսմենը, սակայն, այլ մանրամասներ այս միջադեպից դեռ չի հայտնել:
Պաշտոնյաներից մեծ սպասելիքներ չունի իրավապաշտան Ալեքսանյանը։ Իր ահազանգի նպատակը նաև հանրային ճնշման ակնկալիքն է։
«Այս մարդիկ փակ վիճակում, զրկված ամեն ինչից, 30 տարուց ավելի ցմահ դատապարտյալներ կան, և այդ օրենքներում ոչինչ չարեցին, որ այդ մարդկանց վերասոցիալականացնեն», - նշեց նա:
Ամենաթողության պայմաններում մեղավորները չեն պատժվում և չեն պատժվի այս դեպքում էլ, կարծում է իրավապաշտպանը՝ պնդելով՝ փակ հաստատություններում մարդկանց իրավունքները շարունակվում են ոտնահարվել։
Արդարադատության նախարար Սրբուհի Գալյանը լրագրողների հետ զրույցում վստահեցրել է, որ ՔԿՀ-ներում իրավաչափ, համարժեք պատասխանից բացի, որևէ այլ բան չի կարող կիրառվել:
«Այսինքն՝ մենք իրականացնում ենք օրենքից բխող մեր լիազորությունը», - ասաց նա՝ հավելելով, - «Կոնկրետ այսօրվա դեպքերի հետ կապված նաև ՄԻՊ-ն է գնացել և ներկա է գտնվել, արդեն դեպքից հետո տիրող իրավիճակին ծանոթացել է: Տվյալ անձինք ենթարկվել են բժշկական զննության, այս պահի դրությամբ հայտնաբերված վնասվածքով անձ մենք չունենք»:
Նախարարը շեշտեց, որ խնդիրներն այնտեղ բռնությամբ չեն լուծվում: