ԱՄՆ նախագահի վարչակազմը ուրբաթ օրը հրամաններ է արձակել, որոնք փաստացի թեթևացնում են Սիրիայի նկատմամբ կիրառվող պատժամիջոցները։ Սա տեղի է ունեցել այն բանից հետո, երբ նախագահ Դոնալդ Թրամփը այս ամիս խոստացել էր վերանայել սահմանափակումները՝ օգնելու երկրին վերականգնվել կործանարար քաղաքացիական պատերազմից հետո։
ԱՄՆ գանձապետարանի նախարարությունը հրապարակել է ընդհանուր լիցենզիա, որը թույլ է տալիս գործարքներ իրականացնել նախագահ Ահմեդ ալ-Շարաայի գլխավորած ժամանակավոր սիրիական կառավարության, ինչպես նաև կենտրոնական բանկի և պետական ձեռնարկությունների հետ։
Սպիտակ տունը հայտնել է, որ Թրամփը նախորդ շաբաթ Շարաայի հետ հանդիպմանը պահանջել է, որ Սիրիան կատարի մի շարք պայմաններ պատժամիջոցների մեղմացման դիմաց, այդ թվում՝ բոլոր օտարերկրյա զինյալներին հեռացնել Սիրիայից, արտաքսել «պաղեստինցի ահաբեկիչների» և օգնել ԱՄՆ-ին՝ կանխելու «Իսլամական պետություն» (ԻՊ) խմբավորման վերածնունդը։
Սիրիան ողջունել է պատժամիջոցների մեղմացումը։ Արտաքին գործերի նախարարությունը դա անվանել է «դրական քայլ՝ ուղղված երկրի հումանիտար և տնտեսական տառապանքները մեղմելուն»։
Սիրիան պատրաստակամ է համագործակցել այլ երկրների հետ՝ «փոխադարձ հարգանքի և ներքին գործերին չմիջամտելու դրույթների հիման վրա», ասված է նախարարության հայտարարության մեջ:
ԱՄՆ-ի կողմից Սիրիայի նկատմամբ կիրառված պատժամիջոցները մեծամասամբ սահմանվել էին նախկին առաջնորդ Բաշար ալ-Ասադի և առանցքային անձանց նկատմամբ 2011 թվականին քաղաքացիական պատերազմի բռնկումից հետո։ Շարաան ղեկավարել է այն զինված խմբավորումները, որոնք 2024-ի դեկտեմբերին տապալել են Ասադին։
