Ալավերդու համայնքապետարանը հետ է կանգնել 77 հազար դոլար արժողությամբ ծառայողական մեքենա գնելու մտադրությունից։ Այս գումարը բյուջեում և այս տարվա աշխատանքային պլանում ներառվել էր անցած տարվա վերջին: Երեք ամիս անց արդեն՝ այսօր, Ալավերդու համայնքապետ Դավիթ Ղումաշյանն «Ազատությանն» ասաց՝ չնայած ծառայողականի կարիք ունեն, բայց մտափոխվել են, ու բյուջեով նախատեսված 30 միլիոն դրամը կուղղեն այլ նպատակի՝ գյուղատնտեսական տեխնիկայի ձեռքբերմանը։
«Նախատեսված եղել է, բայց մենք այս պահին չենք նախատեսում գնել ու առաջիկայում էլ չենք նախատեսում», - ասաց նա:
Ավագանին այս 30 միլիոն դրամանոց ծառայողականի գնումը հաստատել էր հենց այն օրերին, երբ վարչապետը պահանջել էր կրճատել ծառայողական մեքենաների քանակը։ Նա կառավարության նիստում սպառնացել էր սահմանափակել համայնքների պետական սուբվենցիաները իր պահանջներին չհետևելու դեպքում: Ավելի վաղ իր ֆեյսբուքյան էջում տեսանյութ էր հրապարակել, որտեղ գրչի հարվածով կրճատում էր ծառայողական մեքենաները: Նույն օրը երեկոյան Հանրային հեռուստատեսությանը տված հարցազրույցում արդեն խոսել էր «կացնային գործողությունների» մասին։
Չնայած այդ զգուշացումներին, Ալավերդու ավագանին՝ առանց ընդդիմության մասնակցության, հաստատել էր թանկարժեք մեքենայի ձեռքբերումն արդեն այս տարվա ծախսերի մեջ։
Երեք ամիս անց համայնքապետն այն «ավելորդ» ծախս է համարում։ «Ազատության» հարցին, թե ինչով է սա պայմանավորված, Դավիթ Ղումաշյանը պատասխանեց. «Բացի վարչապետի հրահանգները, նաև համայնքում խնդիրներ կան, գյուղատնտեսական և աղբահանության համար տեխնիկաների համար են այդ գումարներն օգտագործվելու, ծառայողական որպես այդպիսին մեքենա չենք գնելու միանշանակ»:
Ալավերդու ՔՊ-ական համայնքապետ Դավիթ Ղումաշյանը, որ պաշտոնավարում է ավելի քան մեկ տարի, անցած տարեվերջին ծառայողական մեքենան «ավելորդ» չի համարել։ «Ազատության» հարցին, թե ինչու՞ է այն ներառվել աշխատանքային պլանում, եթե ավելի կարևոր խնդիրներ կային, Ղումաշյանը հրաժարվեց մեկնաբանել, առաջարկեց գրավոր դիմել ու անջատեց հեռախոսը։
Ղումաշյանը նշեց, թե արդեն 7 ծառայողական մեքենա կրճատել են՝ առանց մանրամասնելու, թե ինչ վիճակում են դրանք գտնվել՝ արդյո՞ք մինչև այժմ շահագործվում էին կամ արդյո՞ք օտարելու դեպքում համայնքին շահույթ կբերեն:
Մինչդեռ Լոռու մարզի մեկ այլ համայնքում՝ Սպիտակում, անցած տարվա ամռանը ծառայողական մեքենայի պատմությունն այլ ընթացք էր ստացել: Այնտեղ համայնքապետ Քաջայր Նիկողոսյանը, ունենալով ընդամենը երեք տարեկան «Լեքսուս», ձեռք էր բերել նոր՝ 46 հազար դոլարանոց ամենագնաց: Դա համայնքապետարանի ունեցած 6 ծառայողականներից մեկն էր: Ավագանին միաձայն համաձայնել ու հաստատել էր թանկարժեք գնումը:
Թե ինչու էր ընդամենը մի քանի տարեկան «Լեքսուս»-ի փոխարեն Սպիտակի համայնքապետարանը նոր, կրկնակի թանկ մեքենա ձեռք բերել, համայնքի ղեկավար Քաջայր Նիկողոսյանը խուսափել էր ուղիղ պատասխանել «Ազատության» հարցին, հորդորել էր գրավոր հարցում ուղարկել։
Հետագայում նա գրավոր պատասխանել էր, թե «Լեքսուս»-ը վթարի է ենթարկվել և չի շահագործվում: Վթարի գործով քրեական վարույթ այդպես էլ չեղավ, վթարված «Լեքսուս»-ի ճակատագիրն էլ դեռ անհայտ է, դրա փոխարեն համայնքի ղեկավարը նոր «GEELY MONJARO» ամենագնաց ունի։
Սպիտակի ծառայողականի ձեռքբերումը, թեև լայն քննարկման արժանացավ լրատվամիջոցներում, որևէ հետևանք այդպես էլ չունեցավ, մինչդեռ Ալավերդին, կարծես, հետևելով վարչապետի պահանջներին, հրաժարվեց նմանատիպ ծախսից:
