Ադրբեջանը նախատեսում է ընդլայնել դեպի Եվրոպա բնական գազի աշխարհագրությունը, Բաքվում հայտարարել է Ադրբեջանի նախագահ Իլհամ Ալիևը՝ Հարավային գազային միջանցքի և Կանաչ էներգիայի խորհրդատվական խորհուրդների հանդիպման ժամանակ։
«Մենք արդեն աշխատում ենք եվրոպական որոշ երկրներում գազաբաշխիչ ցանցեր ստեղծելու ուղղությամբ։ Որոշ երկրներում դրանք կան, մյուսներում դրանք պետք է ընդլայնվեն։ Այսպիսով՝ մեր գազամատակարարման աշխարհագրությունը միանշանակ կընդլայնվի», - ասել է Ադրբեջանի նախագահը։
Ըստ Ալիևի՝ Բաքուն այսօր բնական գազ է մատակարարում 12 երկրների․10-ը՝ եվրոպական, 8-ը՝ Եվրամիության անդամ երկրներ են։
Ալիևը միևնույն ժամանակ ընդգծել է Եվրոպայում ադրբեջանական գազի երկարաժամկետ պահանջարկի երաշխավորման կարևորությունը։
«Մենք պետք է վստահ լինենք, որ մեր բնական գազը պահանջարկ կունենա Եվրոպայում: Եթե նման երաշխիքներ չունենանք, ո՛չ ներդրողները, ո՛չ երկրները գումար չեն տա: Այսպիսով՝ բնական գազի հսկայական դեֆիցիտ կլինի: Մեր պաշարները հայտնի են», - ասել է Ադրբեջանի նախագահը՝ շեշտելով, որ նոր հանքավայրերից նոր արդյունահանում են ակնկալում։
