Ադրբեջանի նախկին դեսպան Ռաֆայել Իբրահիմովը Մեծ Բրիտանիայում 16-ամսյա ազատազրկման է դատապարտվել սեռական ոտնձգությունների համար, հաղորդում են բրիտանական լրատվամիջոցները:
Northwich Guardian-ը, վկայակոչելով դատական փաստաթղթերը, հայտնում է, որ ադրբեջանցի նախկին դիվանագետը մեղավոր է ճանաչվել Չեշիրի վերականգնողական կենտրոնի երեք աշխատակիցների նկատմամբ սեռական բռնությունների համար։
Աղբյուրի փոխանցմամբ՝ նրա պատիժն ուժի մեջ կմտնի երկու տարուց։ Բացի ազատազրկումից, դատարանը Իբրահիմովին պարտավորեցրել է 20-օրյա ուղղիչ աշխատանք և 200-ժամյա հանրային աշխատանք կատարել։ Դատարանի որոշմամբ նախկին դեսպանի անունը 10 տարի ժամկետով ներառվել է սեռական հանցագործությունների ռեգիստրում:
Իբրահիմովը Մեծ Բրիտանիայում, Նորվեգիայում, Իռլանդիայում, Շվեդիայում և Ֆինլանդիայում Ադրբեջանի դիվանագիտական ներկայացուցչությունները գլխավորել է 2001-2013 թվականներին: 2014-ից նա հեռացել է պաշտոնից, բայց շարունակել է բնակվել Լոնդոնում:
