Աշխատանքային այցով Իրանում գտնվող տարածքային կառավարման և ենթակառուցվածքների նախարար Դավիթ Խուդաթյանը հանդիպել է ԻԻՀ նավթի նախարար Մոհսեն Փաքնեժադիի հետ, հայտնում է ՀՀ ՏԿԵ նախարարությունը:
Կողմերը քննարկել են մատակարարվող գազի ծավալներն ավելացնելու, ինչպես նաև էներգետիկ ոլորտում առևտուրը ընդլայնելու հարցեր:
Հանդիպման ժամանակ պայմանավորվածություն է ձեռք բերվել ստեղծել համատեղ մասնագիտացված աշխատանքային խումբ, որը կզբաղվի էներգետիկ համագործակցության զարգացման նոր ուղղությունների ուսումնասիրությամբ և համատեղ նախաձեռնությունների մշակմամբ։
Ավելի վաղ իրանական Mehr-ը հայտնել էր, աշխատանքային խումբ կկենտրոնանա գազի առևտրի վրա:
Իրանի նավթի նախարարը նշել է, որ երկու երկրների միջև գործող էներգետիկ գործընկերությունը հիմնված է գազ էլեկտրաէներգիայի դիմաց փոխանակման համաձայնագրի վրա։ Այնուամենայնիվ, ըստ նրա, Իրանը առաջարկել է նոր առևտրային շրջանակ, որը նպատակ ունի ընդլայնել բնական գազի արտահանումը։
IRNA-ի փոխանցմամբ էլ՝ Իրանի նավթի նախարարը հանդիպումից հետո Հայաստանը բնութագրել է որպես Իսլամական Հանրապետության «շատ լավ հարևաններից մեկը»՝ ընդգծելով, որ երկու երկրներն ունեն համագործակցության բազմաթիվ հնարավորություններ, մասնավորապես՝ էներգետիկայի ոլորտում, որոնք պետք է հետագայում զարգանան։
Հայկական կողմի փոխանցմամբ՝ հանդիպման ընթացքում քննարկվել են ենթակառուցվածքների, նավթարդյունաբերության ոլորտներում համագործակցության ընդլայնման և փոխգործակցության խորացմանն առնչվող հարցեր։
Հուլիսի 19-ին Հայաստանում Իրանի դեսպան Մեհդի Սոբհանին ասել էր, որ մոտ ապագայում Իրանից Հայաստան գազամատակարման ծավալները կրկնապատկվելու են։
2009 թվականից սկսած Հայաստանը Իրանից գազ է ստանում և, ջերմակայանում այն վերածելով էլեկտրաէներգիայի, հետ է մատակարարում Իրանին։
Այս համաձայնագրի ժամկետն ավարտվում է 2026 թվականին։ Սական 2023-ի օգոստոսին Հայաստանն ու Իրանը երկարաձգեցին «գազ էլեկտրաէներգիայի դիմաց» ծրագրի ժամկետը մինչև 2030 թվականը։
