Կենտրոնական ընտրական հանձնաժողովն ամփոփեց ընտրությունների նախնական արդյունքները, ըստ որոնց՝ ձայները բաշվում են հետևյալ կերպ.
«Քաղաքացիական պայմանագիր» - 727 հազար 827 ձայն, 49.825 տոկոս;
«Ուժեղ Հայաստան» - 340 հազար 88 ձայն, 23.281 տոկոս;
«Հայաստան» դաշինք - 145 հազար 113 ձայն, 9.934 տոկոս;
«Բարգավաճ Հայաստան» կուսակցություն - 58 հազար 378 ձայն, 3.996 տոկոս:
Ըստ այս նախնական արդյունքների՝ ԲՀԿ-ին 0.004 տոկոս չի բավարարում անցողիկ 4 տոկոսի շեմը հաղթահարելու համար:
ԿԸՀ նիստի սկզբում հանձնաժողովի նախագահ Վահագն Հովակիմյանը պարզաբանեց. - «Կայքում հրապարակված թվերը չեն ներառում էլեկտրոնային քվեարկության արդյունքները, ավելին՝ տոկոսային հաշվարկը, որ համակարգը անում է, հարյուրերորդականով հաշվարկած կլորացնում է, երբ որ կայքի հրապարակած թվերը զուտ գումարենք, այդ բացարձակ թվերից տոկոս հաշվարկեք, կտեսնեք, որ որոշակի տարբերություն կա հազարերորդական մակարդակով. սա այն դեպքում, երբ այդ թվերի մեջ ներառված չէ էլեկտրոնային քվեարկության արդյունքները: Այս դեպքում գործ ունենք մի իրավիճակի հետ, երբ մեկ ձայնը անգամ կարող է որոշիչ լինել շեմին շատ մոտ քաղաքական ուժի [այսինքն՝ ԲՀԿ-ի] համար»:
«Բայց սրանք նախնական արդյունքներ են, մենք դեռ ունենք ճշգրտման, վերահաշվարկի փուլ, բոլոր ջանքերը պետք է գործադրենք, որ մեկ ձայնի ճշգրտությամբ թվեր ունենանք, և այն արդյունքը, որ կունենանք, իդեալական արտացոլի Հայաստանի ընտրողների կամքը», - վստահեցրեց Հովակիմյանը:
Ղազախստանի նախագահ Կասիմ-Ժոմարտ Տոկաևը շնորհավորել է Նիկոլ Փաշինյանին «Քաղաքացիական պայմանագիր» կուսակցության՝ խորհրդարանական ընտրություններում տարած հաղթանակի կապակցությամբ։
«Կասիմ-Ժոմարտ Տոկաևը Նիկոլ Փաշինյանին մաղթել է հետագա արդյունավետ աշխատանք՝ ի շահ Հայաստանի երկարաժամկետ ազգային շահերի»,- ըստ ՌԻԱ-ի, ասվում է նախագահի մամուլի ծառայության հաղորդագրության մեջ։
Ղազախստանի նախագահը նշել է, որ իր երկիրը պատրաստ է շարունակել ակտիվ համագործակցությունը բարեկամ Հայաստանի հետ՝ փոխադարձ հետաքրքրություն ներկայացնող բոլոր ոլորտներում։ Տոկաևը նաև հայ ժողովրդին մաղթել է հաջողություններ պետության զարգացման գործում, ինչպես նաև խաղաղություն և բարեկեցություն։
Գիշերը, երբ ընտրությունների արդյունքների վերաբերյալ ամբողջական պատկեր դեռևս չկար, Վրաստանի վարչապետ Իրակլի Կոբախիձեն շնորհավորեց Փաշինյանի գլխավորած քաղաքական ուժին՝ ընտրություններում հաջողության հասնելու կապակցությամբ։
«Անհամբերությամբ սպասում եմ մեր սերտ համագործակցության շարունակությանը՝ Վրաստանի և Հայաստանի միջև ռազմավարական գործընկերությունն ու բարեկամական հարաբերությունները ամրապնդելու նպատակով՝ մեր ազգերի բարգավաճման համար», գրել է Վրաստանի վարչապետը «X»-ի միկրոբլոգում:
Վրաստանի նախկին նախագահ Սալոմե Զուրաբիշվիլին ևս շնորհավորել է, նշելով, որ Հայաստանն այսօր ամուր ընտրություն է կատարել հօգուտ ազատ, անկախ և եվրոպական ապագայի։
Եվրոպական հանձնաժողովի նախագահ Ուրսուլա ֆոն դեր Լայենը շնորհավորել է ՀՀ վարչապետ Նիկոլ Փաշինյանին խորհրդարանական ընտրություններում «Քաղաքացիական պայմանագիր» կուսակցության արձանագրած հաղթանակի առիթով։
«2018 թվականին Ձեր գլխավորած թավշյա հեղափոխության ոգին կենդանի է և առողջ։ Մենք խորապես գնահատում ենք մեր գործընկերությունը ժողովրդավարական Հայաստանի հետ, որն ավելի ու ավելի է մոտենում Եվրոպային։ Հայաստանը կարող է հույս դնել մեզ վրա», X-ում գրել է Եվրոպական հանձնաժողովի նախագահ։
«Պիտի արձանագրեմ, որ պատերազմի եռագլուխ կուսակցությունը ջախջախված է», - այսօր խորհրդարանում հայտարարեց գործող վարչապետ Նիկոլ Փաշինյանը:
«Բայց սա կարևոր, բայց ոչ վերջնական արդյունք է, որովհետև կարծում եմ, որ ժողովուրդը նաև հստակ իր կամքը արտահայտեց առ այն, որ պատերազմի եռագլուխ կուսակցությունը և նրան ուղեկցող քրեաօլիգարխիկ համակարգը պետք է արմատախիլ արվի Հայաստանի Հանրապետությունից, և իհարկե սա լինելու է քաղաքական մեծամասնության և Կառավարության կարևորագույն օրակարգերից մեկը, որը մենք պետք է իրականացնենք առանց հետաձգումների և շատ վճռական և հատու քայլերով», - ասաց «Քաղաքացիական պայմանագրի» առաջնորդը:
Բոլոր քվեաթերթիկների հաշվարկման նախնական արդյունքներով՝ անցողիկ շեմը հաղթահարել են «Քաղաքացիական պայմանագիր» կուսակցությունը, «Ուժեղ Հայաստան» և «Հայաստան» դաշինքները և «Բարգավաճ Հայաստան» կուսակցությունը:
«Քաղաքացիական պայմանագիր»-ը ստացել է 727 հազար 160 ձայն կամ 49.81 տոկոսը, «Ուժեղ Հայաստան»-ը՝ 340 հազար 62 ձայն կամ 23.29 տոկոսը, «Հայաստան»-ը՝ 145 հազար 97 ձայն կամ 9.94 տոկոսը, «Բարգավաճ Հայաստան»-ը՝ 58 հազար 368 ձայն կամ 4 տոկոսը:
Մյուս քաղաքական ուժերը չեն հաղթահարել Ազգային ժողովում ներկայացված լինելու անցողիկ շեմը:
«Ուժեղ Հայաստան» դաշինքի առաջնորդ Սամվել Կարապետյանը գիշերը հայտարարությամբ հանդես եկավ՝ «խայտառակ» որակելով ընտրությունները:
«Դուք բոլորդ այս մեկ ամսում տեսաք՝ ինչ հալածանքների էինք մենք ենթարկվում, ինչ բռնությունների էինք մենք ենթարկվում: Մեզանից, մեր թիմակիցներից մոտ 75 հոգի այսօր կալանավորված են, 700-ից ավել մարդ ձերբակալվել են, և այս մարդիկ նույնիսկ չհանգստանալով՝ որոշեցին ընտրությունների օրը անհասկանալի գործերով զբաղվել: Նույնիսկ աշխարհի պատմության մեջ չի եղել դեպք, երբ հաշվարկի ժամանակ ընդհատում են ու ասում են՝ «առավոտյան 9-ին կներկայացնենք արդյունքները», - հայտարարեց տնային կալանքում գտնվող ռուսաստանցի գործարարը:
Կարապետյանի պնդմամբ՝ «տեսնելով, որ խայտառակ ձևի իրենց արդյունքները նվազում են, և ամեն րոպե նվազում են, իրենք կանգնեցրին հաշվարկը, և մենք նույնիսկ չենք հասկանում՝ առավոտյան ինչ են ներկայացնելու»:
«Վստահ եղեք՝ ընտրությունները դեռ չեն ավարտվել, ընտրական արդյունքները դեռ չկան, [...] ինքը, իրենք չեն ունենալու իրենց ուզած հաղթանակը», - հայտարարեց «Ուժեղ Հայաստան»-ի առաջնորդը:
«Անպայման առավոտյան վերջնական արդյունքները ունենալուց հետո մենք նոր կարող ենք ասել և անպայման հայտարարությամբ հանդես կգանք ընտրության արդյունքների մասին», - ասաց Կարապետյանը:
Նշենք, որ Կենտրոնական ընտրական հանձնաժողովն իր պաշտոնական կայքէջում շարունակում է թարմացնել տվյալները, և արդեն ամփոփված են 2005 ընտրատեղամասերի կեսից ավելիի՝ 1029 տեղամասերի նախնական արդյունքները:
«Հայաստան» ընդդիմադիր դաշինքի պատգամավորի թեկնածու, ՀՅ Դաշնակցության Հայաստանի Գերագույն մարմնի ներկայացուցիչ Իշխան Սաղաթելյանը պնդում է, որ նախքան ընտրությունների արդյունքների ամփոփումը Նիկոլ Փաշինյանի հայտարարությունները «Քաղաքացիական պայմանագրի» հաղթանակի մասին «պարզապես ԿԸՀ-ի վրա ճնշում գործադրելու և իշխանությունը յուրացնելու քայլեր են»։
«Առանց ընտրվելու՝ դատական համակարգին հրահանգավորելուց առաջ, դու դեռ պետք է պատասխան տաս այսօր գրանցված բոլոր ընտրախախտումների համար։
... Այս պահին զբաղված ենք ընտրատեղամասերից ստացվող տվյալների մշակմամբ։ Հիշեցնեմ՝ ԿԸՀ-ն այս պահին ամփոփել է ընտրատեղամասերի մեկ քառորդի արդյունքները։ Վերջնարդյունքների և անելիքների մասին կխոսենք տվյալների ամփոփումից հետո», - Ֆեյսբուքում գրել է Սաղաթելյանը:
«Միասնության թևեր» կուսակցության վարչապետի թեկնածու, նախկին օմբուդսմեն Արման Թաթոյանը, իր հերթին, Ֆեյսբուքում գրում է. - «Նիկոլ Փաշինյանի հայտարարությունը, թե ՔՊ-ն միանձնյա ձևավորում է Կառավարություն և հաղթել է ընտրություններում, հակասահմանադրական է, և վերազանցում է վարչապետի լիազորությունները: Կառավարության ղեկավարը չունի իրավասություն հանդես գալու հայտարարությամբ և հայտարարելու իր միանձնյա հաղթանակի մասին, երբ քվեարկության արդյունքների 10 տոկոսից մի փոքր ավելին է հաշվարկված, երբ Երևանում քվեարկության արդյունքների 10 տոկոսն էլ ամփոփած չէ»:
«Նիկոլ Փաշինյանի այս հայտարարությունը համարում ենք ընտրությունների արդյունքների վրա ազդելու նպատակով ԿԸՀ-ի վրա բացահայտ անօրինական ազդեցություն, որը քրեորեն պատժելի է», - հայտարարում է նախկին ՄԻՊ-ը:
«Լուսավոր Հայաստան» կուսակցության առաջնորդ և վարչապետի թեկնածու Էդմոն Մարուքյանը ևս ընդգծում է, որ Փաշինյանը հայտարարությունն արեց, երբ քվեարկության արդյունքների մոտ 10 տոկոսն էր ամփոփված:
«Սպասենք՝ մեծ դաշինքները տենանք ինչ են ասում», - հայտարարում է Մարուքյանը սոցցանցերում հրապարակած տեսանյութում:
«Տվյալները չկան՝ մարդը ասում է «ես հաղթել եմ»: Ընտրական օրենսդրության բոլոր նորմերի ոտնահարում է, բոլոր», - պնդում է «Լուսավոր Հայաստան»-ի առաջնորդը:
Ընտրությունների արդյունքում հաղթել է «Քաղաքացիական պայմանագիր» կուսակցությունը, և «Քաղաքացիական պայմանագիր» կուսակցությունը միանձնյա կձևավորի կառավարություն: Այս մասին հայտարարեց կուսակցության առաջնորդ, գործող վարչապետ Նիկոլ Փաշինյանը հունիսի լույս 8-ի գիշերը կայացած ասուլիսի ժամանակ:
«Ուզում եմ ընդգծել, որ «Քաղաքացիական պայմանագիր» կուսակցությունը 2021 թվականի համեմատ ստացել է Հայաստանի Հանրապետության ավելի մեծ թվով քաղաքացիների ձայնը, ավելի մեծ թվով քաղաքացիների վստահության քվեն», - ասաց Փաշինյանը:
«Սա պատմական հաղթանակ է, որը միանշանակ ապահովելու է Հայաստանի Հանրապետության հարատևությունը, զարգացումը, և, իհարկե, մենք ունենալու ենք տևական և ինստիտուցիոնալ խաղաղություն», - վստահեցրեց գործող վարչապետը:
Լրագրողի հարցին՝ արդյո՞ք խնդրահարույց չէ իր հայտարարությունը, քանի դեռ ամփոփված չեն բոլոր ընտրատեղամասերի արդյունքները, Փաշինյանն արձագանքեց. - «Գիտե՞ք, մենք բոլոր ընտրական տեղամասերում ունենք վստահված անձինք, և ունենք արձանագրությունները, և մենք մեր սեփական հաշվարկներն ենք անում»:
Կենտրոնական ընտրական հանձնաժողովն ամփոփել է 185 ընտրատեղամասերում քվեարկության նախնական արդյունքները:
Ըստ այդմ՝ ընտրությունների 48 հազար 180 մասնակիցներից 26 հազար 10-ը կամ 55.08 տոկոսը քվեարկել են «Քաղաքացիական պայմանագիր» կուսակցության, 10 հազար 488-ը կամ 22.21 տոկոսը՝ «Ուժեղ Հայաստան» դաշինքի, 4 հազար 260-ը կամ 9.02 տոկոսը՝ «Հայաստան» դաշինքի, 2 հազար 301-ը կամ 4.87 տոկոսը՝ «Բարգավաճ Հայաստան» կուսակցության օգտին:
Մյուս քաղաքական ուժերը ըստ այդ տվյալների չեն հաղթահարում անցողիկ շեմը:
Երևանի թիվ 9/22 ընտրատեղամասում «Քաղաքացիական պայմանագիր»-ը ստացել է 361 ձայն, «Ուժեղ Հայաստան»-ը՝ 342, «Հայաստան»-ը՝ 177, «Բարգավաճ Հայաստան»-ը՝ 13 քվե: