եթերում Իսլամական հեղափոխության պահապանների կորպուսի խոսնակը սպանվել է

Իսրայելի և ԱՄՆ հարվածների ժամանակ հարձակման է ենթարկվել իրանական ինը հիվանդանոց, որոնցից հինգը՝ Թեհրանում, չորսը՝ այլ քաղաքներում: Այս մասին հայտնել է Իրանի խորհրդարանի պատգամավոր, առողջապահության հարցերով խորհրդարանական հանձնաժողովի անդամ Ֆաթեմե Մոհամմադ Բեյղին։

Իրանական պետական լրատվամիջոցների փոխանցմամբ՝ Բեյղին տեղեկացրել է, որ Թեհրանում գտնվող Գանդիի անվան հիվանդանոցն ամբողջությամբ տարհանվել է, իսկ հիվանդները տեղափոխվել են այլ հաստատություններ։

Իրանի կառավարությունը ժողովրդին կոչ է արել այսօր երեկոյան հավաքվել մայրաքաղաքում՝ շարունակվող հարձակումների ժամանակ Իսլամական Հանրապետությանը աջակցություն ցուցաբերելու համար։

Հանրահավաքը նաև նպատակ ունի շաբաթ օրը ԱՄՆ-ի կամ Իսրայելի օդային հարվածների հետևանքով զոհված գերագույն առաջնորդ այաթոլլա Ալի Խամենեիի հիշատակին հարգանքի տուրք մատուցել։

Կոչը հեռարձակվել է պետական հեռուստատեսությամբ։

Իրանի դեմ ռազմական գործողությունները անհրաժեշտության դեպքում կարող են շատ երկար տևել, ԱՄՆ-ն պատրաստ է դրան, հայտարարել է Դոնալդ Թրամփը։

ԱՄՆ նախագահը նաև մեղադրել է նախորդ Բարաք Օբամայի վարչակազմին, որը, ըստ նրա, Իրանին թույլ է տվել զարգացնել իր միջուկային ծրագիրը։ Արդյունքում Իրանը կարող էր միջուկային զենք ստեղծել, եթե ԱՄՆ-ն չմիջամտեր։

Թրամփը նշել է, որ ռազմական գործողությունների նպատակն է նաև ապահովել, որ Իրանը չկարողանա ֆինանսավորել կամ ուղղորդել բանակներ իր սահմաններից դուրս։

FlyOne ավիաընկերության ինքնաթիռն ուղևորվել է Օման, Հայաստանի քաղաքացիներն այդ ինքնաթիռով կվերադառնան Հայաստան։

Ավելի վաղ արտաքին գործերի նախարարությունը հայտնել էր՝ թռիչքների չեղարկման պատճառով Աբու Դաբիում մնացած քաղաքացիների տեղափոխումը կազմակերպելու համար թռիչք նախապատրաստելու աշխատանքների մասին։

Թե քանի քաղաքացի այդ ինքնաթիռով Հայաստան կվերադառնա, Քաղավիացիայի կոմիտեն տվյալներ չունի։

Մերձավոր Արևելքում ծավալվող պատերազմը լուրջ վտանգի է ենթարկում խաղաղ բնակչությանը, զգուշացրել է Կարմիր խաչի միջազգային կոմիտեի (ԿԽՄԿ) ղեկավար Միրյանա Սպոլյարիչը։

«Մերձավոր Արևելքում ռազմական գործողությունների ընդլայնումը լուրջ վտանգի տակ է դնում քաղաքացիական բնակչության կյանքը», - ասվում է Սպոլյարիչի հայտարարությունում, որը հրապարակվել է կազմակերպության X-ի էջում։

«Մերձավոր Արևելքում ծավալվող խոշոր ռազմական գործողությունների մասշտաբները վտանգում են տարածաշրջանը և դրանից դուրս երկրները ներքաշել ևս մեկ լայնածավալ զինված հակամարտության մեջ, որը ոչ մի մարդասիրական օգնություն չի կարողանա հաղթահարել», - ասվում է հայտարարությունում։

«Հեզբոլա»-ն դատապարտել է երկրի կառավարությանը, այն բանից հետո, երբ Լիբանանի վարչապետ Նավաֆ Սալամը հայտարարեց, որ շարժման ռազմական գործունեությունն արգելված է։

Սալամի հայտարարությունը հնչեց մի քանի ժամ անց այն բանից հետո, երբ Իսրայելը պատասխանեց Իրանի աջակցությունն ստացող ու Արևմուտքի կողմից ահաբեկչական ճանաչված խմբավորման՝ ավելի վաղ հրթիռներով ու անօդաչուներով իրականացրած հարձակմանն ու Բեյրութի հարավային արվարձաններին ավիահարվածներ հասցրեց։

«Մենք հասկանում ենք Լիբանանի կառավարության անզորությունը սիոնիստական դաժան թշնամու առջև, որը խախտում է ազգային ինքնիշխանությունը, օկուպացնում է հողերը և շարունակական սպառնալիք է ներկայացնում երկրի անվտանգությանն ու կայունությանը», - հայտարարել է «Հեզբոլա»-ն՝ հավելելով, որ կառավարության իրավունքն է որոշել՝ պատերազմ է ցանկանում, թե խաղաղություն։

«Այնուամենայնիվ, հաշվի առնելով այս ակնհայտ թուլությունն ու թերությունը, մենք որևէ պատճառ չենք տեսնում, որ վարչապետ Սալամը և նրա կառավարությունը նման ագրեսիվ միջոցներ ձեռնարկեն օկուպացիան մերժող լիբանանցիների դեմ», - նշվում է հայտարարությունում։

Շարժման հայտարարությունում նաև ասվում է, որ «Հեզբոլա»-ի արձագանքը Իսրայելին «լիբանանյան պատրանքային անվտանգությանն ու խաղաղությանը հասնելու միջոցն է»։

ԱՄՆ նախագահն արդարացրել է Իրանի վրա ամերիկա-իսրայելական համատեղ հարվածները՝ ասելով, որ երկրի միջուկային ծրագիրը աճող սպառնալիք է Միացյալ Նահանգների համար։ Դոնալդ Թրամփը նաև նշել է, որ արդեն իրանական 10 նավ են ոչնչացրել։

«Սա մեր վերջին լավագույն հնարավորությունն էր՝ հարվածելու և վերացնելու այս հիվանդ և չարագործ ռեժիմի կողմից ներկայացվող անհանդուրժելի սպառնալիքները», - Սպիտակ տանը լրագրողներին ասել է նա։

Թրամփը նշել է, որ գործողության «նպատակները հստակ են», դրանցից առաջինը Իրանի հրթիռային կարողությունների ոչնչացումն է։

«Երկրորդ,՝մենք ոչնչացնում ենք նրանց նավատորմը. մենք արդեն ոչնչացրել ենք 10 նավ, դրանք ծովի հատակում են։ Երրորդ՝ մենք ապահովում ենք, որ ահաբեկչության աշխարհի թիվ մեկ հովանավորը երբեք չկարողանա միջուկային զենք ձեռք բերել», - ասել է Սպիտակ տան ղեկավարը։

ՆԱՏՕ-ի գլխավոր քարտուղար Մարկ Ռյուտեն բարձր է գնահատել ԱՄՆ-ի և Իսրայելի ռազմական գործողությունները Իրանի դեմ, սակայն բացառել է դրանց դաշինքի միանալը։

Բրյուսելում գերմանական ARD հեռուստաընկերությանը տված հարցազրույցում Ռյուտեն ասել է, որ «շատ կարևոր» է այն, ինչ ԱՄՆ-ն անում է «Իսրայելի հետ միասին»՝ Իրանի միջուկային և բալիստիկ հրթիռների զարգացման կարողությունները վերացնելու և թուլացնելու համար։

«ՆԱՏՕ-ն բացարձակապես որևէ ծրագիր չունի ներքաշվելու այս գործընթացի մեջ կամ լինելու դրա մաս», - ասել է նա՝ հավելելով, որ առանձին դաշնակիցները կարող են աջակցել ԱՄՆ ջանքերին։

Իրանի Իսլամական հեղափոխության պահապանների կորպուսը (ԻՀՊԿ) հայտարարել է, որ Հորմուզի նեղուցում հարձակվել է ԱՄՆ-ի հետ կապված ենթադրյալ նավթատար նավի վրա՝ ի պատասխան Իրանին ամերիկա-իսրայելական հարձակումների։

«ATHE NOVA տանկերը, որը Հորմուզի նեղուցում ամերիկյան դաշնակիցներից մեկն է, դեռևս այրվում է երկու անօդաչու թռչող սարքերի հարվածից խոցվելուց հետո», - ասվում է ԻՀՊԿ-ի հայտարարությունում։

ԻՀՊԿ-ն շաբաթ էր հայտարարել, որ փակել է ջրային ճանապարհը, որը կենսական նշանակություն ունի նավթի և գազի համաշխարհային առաքումների համար։

Հորմուզի նեղուցով են անցնում աշխարհում վաճառվող նավթի մոտ մեկ հինգերորդը և Կատարից ու Արաբական Միացյալ Էմիրություններից արտահանվող հեղուկ բնական գազի զգալի մասը։ Նավթի համաշխարհային օրական սպառման մոտ 20 տոկոսը՝ մոտ 20 միլիոն բարել, ևս անցնում է այստեղով։

Արաբական Միացյալ Էմիրությունների մայրաքաղաք Աբու Դաբիում ենթադրաբար իրանական անօդաչուն վառելիքի տերմինալի է հարվածել՝ հրդեհ առաջացնելով։ Տերմինալի գործունեությունը հրդեհի հետևանքով չի կանգնել։

«Աբու Դաբիի իշխանություններն այսօր արձագանքել են Մուսաֆայի վառելիքի տերմինալի վրա անօդաչու թռչող սարքի հարձակման հետևանքով առաջացած հրդեհին», - ասվում է Աբու Դաբիի մամուլի ծառայության տարածած հայտարարությունում։

«Իրավիճակն անմիջապես վերցվել է հսկողության տակ։ Վիրավորներ չկան, հրդեհը տերմինալի գործունեության վրա որևէ ազդեցություն չի եղել»,- նշվում է հայտարարությունում։