Reuters-ը, հղում անելով ականատեսներին, հաղորդում է, որ պայթյունի ձայներ են լսվել Կատարի մայրաքաղաք Դոհայում, որտեղ տեղակայված է Մերձավոր Արևելքում ԱՄՆ ամենամեծ ռազմակայանը։
Իսրայելի ռազմական գերատեսչության խոսնակը տարհանման նախազգուշացում է տվել Իրանում ռազմական բազաների մոտակայքում ապրողներին, հաղորդում է Reuters-ը:
Բահրեյնը հայտնել է, որ ԱՄՆ-ի հինգերորդ նավատորմի սպասարկման կենտրոնը հրթիռային հարձակման է ենթարկվել, փոխանցում են տեղական լրատվական գործակալությունները:
Իրանի դեմ սկված ռազմական գործողություններին ի պատասխան՝ Թեհրանը կթիրախավորի տարածաշրջանում գտնվող բոլոր ամերիկյան ռազմական բազաները, ասել է Իրանի արտգործնախարարը Իրաքի գործընկերոջ հետ զրույցում։
Ըստ պաշտոնական Բաղդադի՝ Աբբաս Արաղչին նաև պնդել է, որ Թեհրանը շարունակելու է պաշտպանվել հնարավոր միջոցներով։
Բահրեյնում է տեղակայված ԱՄՆ ծովային ուժերի հինգերորդ նավատորմի կենտրոնակայանը: Դրա պատասխանատվության գոտին ընդգրկում է Պարսից ծոցը, Կարմիր ծովը, Արաբական ծովը և Հնդկական օվկիանոսի որոշ մասեր:
Կատարի մայրաքաղաք Դոհայի մոտ գտնվող անապատում է Ալ Ուդեիդ օդային ռազմաբազան: Սա Մերձավոր Արևելքում ամերիկյան ամենամեծ ռազմաբազան է՝ 10 հազար զորակազմով:
Քուվեյթում մի քանի ռազմական օբյեկտներ կան, այդ թվում՝ ԱՄՆ բանակի կենտրոնական շտաբի «Քեմփ Արիֆջան» ռազմաբազան և Ալի Սալեմ ավիաբազան, որը Իրաքի սահմանից մոտ 40 կմ հեռավարության վրա է և առավել հայտնի «Ժայռ» անունով:
Արաբական Միացյալ Էմիրությունների մայրաքաղաք Աբու Դաբիի հարավում է Ալ Դհաֆրա ավիաբազան, որը համատեղ օգտագործվում է ԱՄԷ-ի ռազմաօդային ուժերի հետ: Այն աջակցել է «Իսլամական պետության» դեմ իրականացված գործողություններին և տարածաշրջանում հետախուզական տեղակայումներին:
Դուբայի Ջաբել Ալի նավահանգիստը, չնայած պաշտոնապես ռազմաբազա չի համարվում, բայց ԱՄՆ ռազմածովային ուժերի ամենամեծ կանգառն է Մերձավոր Արևելքում: Այստեղ կանոնավոր կերպով տեղակայվում են ամերիկյան ավիակիրներ և այլ նավեր:
Իրաքում ԱՄՆ-ն ներկայություն ունի Անբար նահանգում տեղակայված Այն Ալ Ասադ ռազմաօդային բազայում: Այն աջակցում է Իրաքի անվտանգության ուժերին և ՆԱՏՕ-ի առաքելությանը։ Իրանն այս բազան թիրախավորել էր 2020 թվականին՝ ի պատասխան ԱՄՆ-ի կողմից իրանցի գեներալ Ղասեմ Սոլեյմանիի սպանության։
Իրաքի կիսաինքնավար Քուրդիստանում է Էրբիլի ավիաբազան, որը ծառայում է որպես կենտրոն ԱՄՆ-ի ու դաշնակից ուժերի վարժանքների ու մարտական զորավարժությունների համար:
Սաուդյան Արաբիայում, ըստ 2024 թվականին Սպիտակ տան տրամադրած տվյալների, ամերիկացի 2 հազար 321 զինվորական է տեղակայված: Նրանք Սաուդյան Արաբիայի կառավարության հետ համակարգմամբ օդային և հրթիռային պաշտպանության կարողություններ են զարգացնում և աջակցում ԱՄՆ ռազմական ինքնաթիռների գործունեությանը: Զինվորականների մի մասը տեղակայված է Ռիադի հարավում գտնվող Արքայազն Սուլթան ավիաբազայում, որը տեխնիկական աջակցություն է ապահովում ամերիկյան զինտեխնիկայի, այդ թվում՝ Patriot հրթիռային մարտկոցների և այլ համակարգերի համար:
Հորդանանի մայրաքաղաք Ամմանից 100 կմ հյուսիս-արևելքում գտնվող Ազրաք քաղաքում է Մուվաֆաք ալ Սալթի ավիաբազան: Այստեղ է տեղակայված ԱՄՆ օդային ուժերի կենտրոնական վարչության 332-րդ օդային հետախուզական թևը:
Իսրայելը հայտարարել է, որ վերջին հարվածների թիրախում են Իրանի գերագույն առաջնորդ այաթոլլա Ալի Խամենեին և նախագահ Մասուդ Փեզեշքիանը՝ առանց հավելյալ մանրամասների։
Reuters-ի աղբյուրն ավելի վաղ հայտնել էր, որ Այաթոլլա Խամենեին Թեհրանում չէ և տեղափոխվել է անվտանգ վայր։
«Իշխանությանը մոտ կանգնած իրանական աղբյուրը հայտնել է, որ սպանվել են Իրանի Իսլամական հեղափոխության պահապանների կորպուսի մի քանի բարձրաստիճան հրամանատարներ և քաղաքական պաշտոնյաներ»,- հաղորդում է Reuters-ը, հավելելով, որ չի կարողացել անկախ կերպով հաստատել այս տեղեկությունը։
Հայաստանի արտաքին գործերի նախարարությունը հետևում է Մերձավոր Արևելքում ստեղծված իրավիճակին:
Երևանը Իրանում և Իսրայելում գտնվող ՀՀ քաղաքացիներին հորդորել է պահպանել անվտանգության կանոնները և հետևել պաշտոնական ցուցումներին։
Իրանը կոչ է արել ՄԱԿ-ի Անվտանգության խորհրդի նիստ գումարել՝ ԱՄՆ-ի և Իսրայելի ռազմական գործողություններին ի պատասխան։
Իսլամական Հանրապետության արգործնախարարությունը նաև հորդորել է ՄԱԿ-ին և Անվտանգության խորհրդին անհապաղ միջոցներ ձեռնարկել «միջազգային խաղաղության և անվտանգության խախտմանը հակազդելու» համար։