ԱՄՆ նախագահ Դոնալդ Թրամփը նախօրեին հայտարարել է, որ Իրանը «շատ վատ աշխատանք» է կատարում՝ Հորմուզի նեղուցով նավթի անարգել անցումն ապահովելու հարցում:
«Իրանը շատ վատ աշխատանք է կատարում, ոմանք կասեն՝ անպատվաբեր։ Սա այն համաձայնագիրը չէ, որը մենք ունենք», - Truth Social-ում գրել է Թրամփը
«Կան հաղորդագրություններ, որ Իրանը վճարներ է գանձում Հորմուզի նեղուցով անցնող տանկերներից։ Ավելի լավ է դա չանեն, իսկ եթե դա անում են, ապա ավելի լավ է հիմա դադարեցնեն», - մեկ այլ գրառման մեջ գրել է Միացյալ Նահանգների նախագահը:
Ապրիլի 9-ին Հորմուզի նեղուցով անցել է 7 նավ, հաղորդում է Reuters-ը, նշելով, որ նախքան պատերազմը սովորաբար այդ թիվը 140-ի շրջակայքում է եղել:
Հորմուզի նեղուցով փոխադրվում է աշխարհում սպառվող նավթի մոտ 20%-ը: ԱՄՆ-ն պնդում է, թե այն բաց է, սակայն ըստ իրանական լրատվամիջոցների՝ սահմանափակ թվով նավեր են անցնում, ընդորում՝ Իրանի հետ համակարգմամբ: Իրանի փոխարտգործնախարար Սաիդ Խատիբզադեն ասել էր, որ նեղուցն ամբողջությամբ կվերաբացվի, երբ դադարեցվի ագրեսիան Լիբանանում:
Իսրայելի վարչապետ Բենյամին Նեթանյահուն նախօրեին հայտարարել է, որ կառավարությանը հանձնարարել է խաղաղության բանակցություններ սկսել Լիբանանի հետ, որոնք կներառեն նաև «Հեզբոլլա»-ի զինաթափումը։
«Հաշվի առնելով Լիբանանի կողմից Իսրայելի հետ ուղիղ բանակցություններ սկսելու բազմիցս արված խնդրանքները, երեկ ես կառավարությանը հանձնարարեցի հնարավորինս շուտ ուղիղ բանակցություններ սկսել Լիբանանի հետ», - ասել է Նեթանյահուն: «Բանակցությունները կկենտրոնանան «Հեզբոլլա»-ի զինաթափման և Իսրայելի ու Լիբանանի միջև խաղաղ հարաբերությունների հաստատման վրա»։
Լիբանանի կառավարությունից առայժմ արձագանք չի եղել Նեթանյահուի հայտարարությանը:
Իսրայելի վարչապետի հայտարարությունից մեկ ժամ առաջ Լիբանանի նախագահն ասել էր, որ «Լիբանանում ստեղծված իրավիճակի միակ լուծումը Իսրայելի և Լիբանանի միջև հրադադարի հասնելն է, որին կհաջորդեն նրանց միջև ուղիղ բանակցությունները»։
Ավելի քան 60 երկիր համատեղ հայտարարությամբ դատապարտել են Լիբանանում ՄԱԿ խաղաղապահների դեմ հարձակումները:
Reuters-ի փոխանցմամբ՝ 63 երկրները և Եվրամիությունը նաև «խորը մտահոգություն են հայտնել Լիբանանում տիրող մարդասիրական իրավիճակի, մասնավորապես՝ քաղաքացիական բնակչության շրջանում զոհերի զգալի թվի, քաղաքացիական ենթակառուցվածքների լայնածավալ ոչնչացման և մեկ միլիոնից ավելի մարդկանց զանգվածային տեղահանման վերաբերյալ»։
Իրանը ռազմավարական նշանակություն ունեցող Հորմուզի նեղուցի կառավարումը կտեղափոխի նոր փուլ, նախօրեին պետական հեռուստատեսությամբ հնչեցված հայտարարության մեջ հայտարարել է Իրանի նոր գերագույն առաջնորդ Մոջթաբա Խամենեին։
«Իրանը չի ձգտում պատերազմին, բայց չի հրաժարվի իր իրավունքներից»,- հավելել է Իրանի գերագույն հոգևոր առաջնորդ Մոջթաբա Խամենեին։
Իսրայելի զինվորականներն այսօր Բեյրութի հարավային արվարձանների բնակիչներին զգուշացրել են անխուսափելի հարվածների մասին և կոչ են արել նրանց տարհանվել։
«Իսրայելի պաշտպանության ուժերը շարունակում են գործել և հարվածել «Հեզբոլլա» ահաբեկչական կազմակերպությանը պատկանող ռազմական ենթակառուցվածքներին հարավային արվարձանների տարբեր տարածքներում։ Իսրայելի պաշտպանության բանակը չի մտադրվում վնասել ձեզ և գործում է միայն «Հեզբոլլա»-ի ակտիվիստների և ռազմական թիրախների դեմ։ Հետևաբար, ձեր անվտանգության համար դուք պետք է անհապաղ տարհանվեք», - ասվում է բանակի արաբերեն հայտարարության մեջ, որը X-ում հրապարակել է Ավիչայ Ադրային։
Իրանի դատաբժշկական կազմակերպության ղեկավարը հայտարարել է, որ պատերազմի ընթացքում ամբողջ երկրում զոհվածների թիվը գերազանցել է 3,000-ը։
Իրանը թույլ չի տա օրական ոչ ավելի, քան 15 նավ անցնի Հորմուզի նեղուցով՝ համաձայն հրադադարի մասին համաձայնագրի։ Լուրը հայտնում է TASS-ը՝ իրանական բարձրաստիճան աղբյուրին հղում անելով։
ՀՀ ԱԳՆ-ն X-ի էջում գրել է. «Խորապես վշտացած ենք ապրիլի 8-ին Լիբանանում տեղի ունեցած ավիահարվածների հետևանքով հարյուրավոր զոհերի և հազարից ավելի վիրավորների կապակցությամբ։
Մենք մեր ցավակցությունն ենք հայտնում զոհվածների ընտանիքներին և արագ ապաքինում ենք մաղթում վիրավորներին»,- ասված է ՀՀ ԱԳՆ-ի հայտարարությունում: Գերատեսչությունը հույս է հայտնել, որ լարվածությունը կթուլանա և բոլոր ռազմական գործողությունները կդադարեն:
ԱՄՆ նախագահի՝ «Իրանում քաղաքակրթության ոչնչացման» մասին հայտարարությունից ժամուկես հետո Հայաստանում Անվտանգության խորհրդի նիստ է հրավիրվել, սակայն դրա մասին չի հայտարարվել, այսօր հայտնեց վարչապետ Նիկոլ Փաշինյանը:
Ըստ նրա՝ տարածաշրջանում իրադրությունը քննարկվել է այդ նիստին: